Ekimenak hainbat hitzaldi eta bisita gidatu eskainiko ditu, azken ikerketa zientifikoak eta aurrerapen teknikoak herritarrei gerturatzeko helburuarekin. Aurkezpenean, Gipuzkoako Foru Aldundiko ordezkariek eta hainbat adituk nabarmendu dute ondarea etengabeko bilakaeran dagoen elementua dela, eta adimen artifiziala bezalako tresnek aukera berriak irekitzen dituztela haren kontserbaziorako.

Egitarauak lau saio nagusi izango ditu, guztiak sarrera librekoak. Lehenengo hitzordua Donostian izango da maiatzaren 20an, adimen artifizialak artxibo historikoetan duen eraginari buruzkoa. Maiatzaren 27an, Gipuzkoako Erdi Aroko egurrezko arkitektura aztertuko dute, lurraldean identifikatutako ehun eraikin baino gehiagoren inguruan.

Ekainaren 3an, Errenterian, Landarbasoko Aizpitarteko kobazuloei buruzko liburu berria aurkeztuko dute, labar artearen garrantzia azpimarratuz. Azkenik, ekainaren 10ean, Zarauzko Santa Klara komentua bisitatzeko aukera izango da, eraikinaren birgaitze prozesua eta erabilera publiko berria ezagutzeko.