Atzoko arratsaldean Hernanin giro ezin hobea nagusitu zen, alai eta dibertigarria, erraldoiak gustuko dituztenentzat antolatutako dantza tailer batean. Aratz Ikastolak antolatutako ekitaldiak arrakasta nabarmena izan zuen, eta parte hartzaileek arratsalde aparta igarotzeko aukera izan zuten. Bertako haurrek ilusio handiz hartu zuten parte tailerrean, erraldoiak gertutik ezagutzeaz gain, dantzaz eta jolasez gozatzeko aukera izan zutelarik.

Tailerraren ondoren egindako kalejirak ere «festa giro paregabea» zabaldu zuen herrian. Musika, dantza eta parte hartzaileen irribarreak lagun, Hernaniko kaleak alaitasunez bete ziren, herritarren artean giro beroa eta zoriontsua sortuz.

Kalejiran parte hartu zuen, baita ere, sortu berri den Karabelgo Konpartsa Txikiak. Auzoko gaztetxoak «oso pozik» ibili zirela nabarmendu dute Konpartsako kideek, eta aitortu dute «resaka emozionalarekin» esnatu direla gaur jardueraren ondoren.

Jarduerak izan duen harrerarekin pozik, Aratz Ikastolak eskerrak eman nahi izan dizkie bertaratu eta parte hartu zuten herritar guztiei. Era berean, eskerrak eman dizkie ekimenaren laguntzaile izan diren Karabelgo Konpartsa Txikiari eta Berriak Elkarteari, «emandako laguntzagatik eta herri mailako jarduera hau posible egiteagatik». Ikastolatik azpimarratu dutenez, «horrelako elkarlanek herrigintza indartzen dute, eta komunitatea saretzen laguntzen dute, guztion artean Hernani biziago eta partehartzaileago bat eraikiz».