Urteetako ikerketa lanaren ondoren, eta Toki Erakundeen Ondasunen Araudia (1986) eta Gipuzkoako Errepide eta Bideen Foru Araua (2006) betez, Udalak Errenteriako Herribideen Udal Sarearen Inbentarioaren hasierako onespena bideratu zuen ekaineko osoko bilkuran.
Herri ondare hau babesteak duen garrantzia azpimarratu da. Oraingoz, 118 kilometro herribide inbentariatu dira Errenteriako lurraldean, eta guztira ia 3.200 hektarea hartzen ditu. Udal-sare honek mendi, larre, ibai, babestutako eremu eta lur askotarako sarbide publiko eta unibertsala bermatzen du, baserrietara, nekazal ustiategietara, aisialdirako guneetara, basoetara eta iturrietara iristeko aukera emanez.
Udalerriko eremu eta inguru guztiak aztertu dira, besteak beste, Artamugarri, Listorreta, Añarbe, Txoritokieta, Egieder, Floreaga, Larreaundi, Zamalbide, Isatse eta Aizpitarte.
Horrela, Udalak jendaurrean jartzeko, kontsultatzeko eta inbentarioaren dokumentuari helegiteak aurkezteko epea ireki du, irailaren 10ean bukatuko delarik. Interesdunek errenteria.eus webguneko iragarki taulan aztertu ahal izango dute dokumentua.
Halaber, bidezko alegazioak aurkeztu ahal izango dituzte telematikoki, ZU! arreta zerbitzuan, edo 39/2015 Legeak aurreikusten dituen gainerako modu eta lekuetan.
