Andoain, Astigarraga, Hernani, Lasarte-Oria, Urnieta eta Usurbil udalek elkarlanean antolatzen dute egitasmoa, eskualdeko autoeskolen laguntzarekin. Hamasei urte hauetan, 1.300 herritar baino gehiagok hartu dute parte, eta zenbaitek zozketa bidezko sariak eskuratu dituzte.
Joan den urtean, 69 herritarrek lortu zuten gidabaimenaren teoria euskaraz egitea eta gainditzea: zazpi Andoainen, zortzi Astigarragan, 28 Hernanin, sei Urnietan eta hogei Usurbilen. Aurtengoa izan da zozketa bateratua egin duten azkeneko aldia, parte hartzea jaisten ari dela ikusita udalek dirulaguntza zuzenak emateko bidea prestatzen ari baitira, bakoitza bere erara. Lasarte-Oriako Udala izan da sistema berri horren aitzindari.
Aurtengoa izango da zozketa bateratua egin duten azkeneko aldia.
Aurtengo ekitaldian, 400 euroko zortzi sari zozkatu ziren. Irabazleak honakoak izan ziren: Maren Jauregi Ugartemendia eta Nahia Gorostidi Lopez (Andoain); Enaitz Isasti Zabaleta (Astigarraga); Eki Sanchez Balerdi, Endika Rekondo Murua eta Ane Livi Santacruz Elosegi (Hernani); Hegoi Lizaso Lopez (Urnieta); eta Saray Hernandez Etayo (Usurbil). Egitasmoaren arduradunek eskerrak eman zizkieten baita ere eskualdeko autoeskolei: Bengoetxea eta Vallina CAP (Andoain), Hernani, Lagunak eta Otamendi (Hernani), eta Solozabal (Urnieta eta Usurbil).
Egitasmoa 2010ean jarri zen martxan, eta harrezkeroztik 1.300 parte hartzaile baino gehiago izan dira eskualdeko sei udalerrietan. Euskadiko Autoeskolen Federakuntzak koordinatzen du Eusko Jaurlaritzaren babesarekin. 2024an webgune berria (gidabaimenaeuskaraz.eus) eta material eguneratua argitaratu zituzten, eta bertan 160 zentro baino gehiagoren mapa eskaintzen da Euskal Autonomia Erkidegoan.
Gainera, webgune honetan izena ematen dutenen artean bi ziklomotor elektriko zozkatuko dituzte abenduaren 3an, Euskararen Nazioarteko Egunean. Zozketan parte hartzeko, gidabaimenaren atal teorikoa euskaraz egin dela egiaztatu beharko da, eta azterketa egin ez dutenek hiru hilabete izango dituzte ziurtagiria aurkezteko.
