Donostialdeako Etengabeko Arreta Guneen (EAG) egoera "katastrofikoa" dela salatu du Kalitatezko Osasun Publikoaren aldeko plataformen koordinadorak. Salatzen dutenez, 2024. urtean %36,4 txandetan medikuen faltak izan ziren, eta datu horiek kontuan izanik, Donostialdeko EAG-ak dira "egoerarik txarrenean" daudenak Euskadin.
Herritarren osasuna arriskuan jartzen ari dela adierazi dute, eta adibide gisa Hernaniko Larrialdiko Zerbitzua medikurik gabe edukitzeak sortzen dituen arriskuak, zerbitzuetara iristeko zailtasunak eta ospitaleko larrialdietan sortzen duen karga aipatu dituzte.
Ez da horrelako elkarretaratze bat egiten duten lehenengo aldia. Duela bi hilabete, apirilaren 21ean, Donostiako Ospitalearen aurrean beste bat egin zuten, eta arloko arduraduna den Maite Martinez gerentearekin bilera eskatu zuten. Ordutik, ez dute inolako erantzunik jaso. Gaurkoarekin, hilabete honetan egiten duten hirugarren kontzentrazioa da, ekainaren 5ean Donostian eta ekainaren 12an Errenterian egin ondoren.
Osakidetzako buruen "konponduko dugu" eta antzeko esamoldeez "nekatuta" daudela adierazi dute. Horrez gain, aseguru pribatuen kontratazioak gorantz doazela nabarmendu dute, eta horrek osasun-zerbitzuetarako ekitatea "hautsi eta desberdintasunak areagotzen" dituela esan dute.
Donostialdeako EAG-en egoera salatzeaz gain, Lasarte-Oria txertoak gaizki jarri diren udalerrien zerrendan sartu dela jakinarazi dute. Hain zuzen ere, txerto batzuk protokoloa errespetatu gabe jarri zitzaizkiela bertako hainbat herritarrei. Ondorioz, "gardentasunez eta informazio osoa" emateko eskatu dute, berriro horrelakorik ez gertatzeko.
