Tokiko ekonomia bultzatzeko tresna honek aldaketa nabarmena izango du aurten. Aurreko urteetan bonuak etxeetara bidaltzen ziren edo norberak deskargatu behar zituen, baina oraingoan establezimenduetan bertan eskuratu ahal izango dira erosketa egiten den une berean.
Udaleko Garapen Ekonomikoaren sailak azpimarratu duenez, ekimenaren arrakasta tokiko saltokien parte-hartzearen araberakoa izango da. Hori dela eta, establezimenduei kanpainara batzeko deia egin zaie, bezeroei abantailak eskaintzeko aukera aprobetxatuz.
Parte hartu nahi duten saltokiek hiru bide dituzte izena emateko: Errenkoalde elkartearen bidez, Udalaren erregistro elektronikoan edo ZU! Zure Udala arreta zerbitzuan. Behin izena emanda, Udalak beharrezko materiala eta informazioa helaraziko die parte-hartzaileei.
Prozesuaren berri emateko, bi bilera informatibo antolatu dira irailean. Lehenengoa irailaren 8an izango da, 14:00etan, Sala Reina aretoan. Bigarren hitzordua irailaren 10ean egingo da, Beraun auzoko Aldakonea eraikinean.
