Taldea, orain, Iñaki Ormaetxea gitarra-joleak, Mikel Usobiaga baxu-joleak, Asier Uribeetxeberria bateria-joleak eta Brian de Inda gitarra-jole berriak osatzen dute. Taldekideek adierazi dutenez, bigarren gitarra baten beharra sumatzen zuten zuzenekoetan indar handiagoa izateko, eta Brian de Inda taldera batzeak sendotasuna eta presentzia eman die.
“"Zuzenekoetan bigarren gitarra batek ematen duen indarra faltan sumatzen genuen, eta hala igo zen Brian de Inda gure trenera. Aspaldi ezagutzen genuen elkar, eta lehenengo entsegutik konektatu genuen laurok. Sendotasuna eta presentzia irabazi dugu gitarra-jole berriaren etorrerarekin."
Disko berria, 'Paradisu faltsuak', 2024ko abenduan grabatu zen Arrasateko Hamarratz Musika Gunean, Mikel Arriaran eta Pello Herizekin batera, bateria, baxua eta gitarra doinuak grabatzeko. Ahotsak, berriz, Asel Errastirekin grabatu zituzten Aretxabaletako kuartelean. Nahasketa eta masterizazio lanak Gaztain estudioko Eñaut Gaztañagak egin ditu.
Zazpi kantu berri hauek rock-and-roll eta punk-rock estiloak uztartzen dituzte, Eskandinaviako eta Kaliforniako rockaren eragin nabarmenarekin. Hitzek, aurreko lanetan bezala, mundu honetan bizitzeak dakartzan ondorioei buruzko gogoetak islatzen dituzte, osasun mentala eta giza sufrimendua bezalako gaiak jorratuz. Taldeak adierazi duenez, ez zaie erraza egiten gauza positiboei buruz idaztea.
Momentuz, abestiak formatu digitalean soilik daude eskuragarri hainbat plataformatan. Dagoeneko argitaratu dute Beñat Abasolorekin grabatutako Labanak kantuaren bideoklipa. Taldeak adierazi duenez, nahiz eta formatu fisikoek gaur egun babes gutxiago izan, CDa laster kaleratuko dute merchandising berriarekin batera, eta etorkizunean biniloa ere argitaratzeko asmoa dute, formatu klasikoagoak maite dituztenentzat.
Taldekideetako bat aita izan berri denez, kontzertuen aurkezpenak lasaiago hartu nahi dituzte. Oraindik ez dute aurkezpen-kontzerturik egin, baina laster iragarriko dituzte lotzen ari diren emanaldien datak.
