Ekimen hau Leintz Gatzagako Udala, Debagoieneko Mankomunitatea eta Debagaraia Landa Garapenerako Elkartea ren elkarlanari esker antolatzen da, Gipuzkoako Foru Aldundiaren Mugikortasuneko, Turismoko eta Lurralde Antolaketako departamentuaren laguntzarekin.
Aurkezpenean, Gatz Museoko arduradunak gatzaren kulturaren garrantzia azpimarratu zuen, Leintz Gatzaga Gipuzkoan gatza ekoiztu duen herri bakarra izan dela gogoratuz, eta ekoizpen hori 2013tik berriro martxan dagoela nabarmenduz. Herriaren eta gatzaren arteko harreman historikoak utzitako ondarea funtsezkoa dela adierazi zuen, eta hori gabe ezin dela ulertu herriaren izaera.
“"Zentzu horretan dator Gatz Eguna. Aurten hamargarren aldiz egingo dugu, eta gatzaren kultura guzti horri egun batez omenaldi bat egiteko aukera da."
Leintz Gatzagako alkate eta Debagoieneko Mankomunitateko Lehendakari den Dorleta Elkorobarrutiak adierazi zuenez, Gatz Eguna herrian errotutako ekimena da, hamargarren urteurrena ospatzen baitu. Azaldu zuen urte hauetan ekimenak garapen handia izan duela, urratsez urrats forma hartuz eta jendearen ekarpenak jasoz.
Elkorobarrutiak jasangarritasunaren garrantzia ere nabarmendu zuen, adieraziz landa eremuetan hori sustatzea ezinbestekoa dela. Gatzagak turismoa behar duela, baina turismo jasangarria izan behar duela azpimarratu zuen, mugikortasunean eta eskaintzen diren produktuetan jasangarritasuna bermatuz.
Mugikortasuneko, Turismoko eta Lurralde Antolaketako Foru Diputatuak, Azahara Dominguezek, bat egin zuen ikuspegi horrekin, eta Lurraldebuseko zerbitzu bereziak iragarri zituen Gatz Egunera modu jasangarrian joateko. Dominguezek azpimarratu zuen horrelako ekimenek Gipuzkoa sustatzeaz gain, lurraldearen barnealdea ezagutzen ez dutenen jakin-mina pizten dutela, udako hilabeteetatik kanpo bisitari kopurua handituz. Debagoienak 2023an baino %30 bisitari gehiagorekin itxi zuela 2024a, eta hazkunde hori turismo gutxi izaten den hilabeteetan gertatu zela gaineratu zuen.
Gatz Eguneko jardueretarako erreserbak egiteko, interesdunek infoturismo@debagoiena.eus helbidera idatzi edo 943 79 64 63 telefono zenbakira deitu beharko dute. Egitarauak gatzaren eta bertako produktuen azoka, mendi irteerak, baso bainuak, gatz xaboiak egiteko tailerrak, tomate landare banaketa, egurrezko joko tradizionalak, Gatz Museora bisita gidatuak, showcooking-a, ikuskizunak eta herri bazkaria barne hartzen ditu.
