Antzuola Arigune proiektuak, herritarren artean euskararen erabilerari buruzko gogoeta sustatzeko helburuarekin, hainbat bideo-pilula kaleratu ditu. Hasiera batean, Larrea anaien entrenamendu-saio bat, Legorburu familiaren kaleko topaketa bat eta Olatz Lezeta alkatearen eta Silvia Ezpeleta Herri Eskolako zuzendariaren arteko elkarrizketa bat argitaratu ziren. Bideo hauek, gaztelerazko elkarrizketak zituzten arren, herritarren arteko komunikazio-kanaletara eta sare sozialetara zabaldu ziren, arreta pizteko asmoz.
Kanpainaren helburua argia zen: "Antzuolako euskaldunak aktibatzea", eta zehatzago esanda, "herritarren artean arreta piztea, hizkuntza-erabileraren inguruko gogoeta sustatzea eta hausnarketari atea zabaltzea". Kanpainak, gutxienez, arreta piztea lortu du, Onintza Legorburuk adierazi duenez: "Larrea anaien bideoarekin jendea moskeatu egin zen, bi zentzutan. Alde batetik, nahasmena eragin zuen: 'Zergatik dabiltza erdaraz?'. Kirol-markaren batentzat egindako promozio-bideo bat izan zitekeen susmoa ere zabaldu zen. Bigarren bideoa zabaldu zenean, batzuk jabetu ziren talderen bat bazebilela euskararen inguruko zeozer egosten. Eta hirugarrena ateratzerako, azalpenen zain zegoen jendea, kanpainaren bat izango zelakoan".
Orain, kanpainaren testuingurua argitzeko azken bideoa argitaratu dute. Bertan, "Zer pasatzen da Antzuolan? Hori nahi al dugu?" galdera zuzenekin hasten da, eta euskaraz hazi eta hezi direnei zuzentzen zaie, "aktibatzeko giltza antzuolarrok daukagulako". Mezu bat ere helarazten die bizitokitzat Antzuola aukeratu dutenei: euskarara gerturatzeko eta euskararekin maitemintzeko erraztasunak ematea. Horregatik, euskaldunak animatzen dira euskararen ulermen maila lortu duten herritarrekin euskara erabiltzera.
Ekimen hau Gipuzkoa Arigune egitasmoaren baitan kokatzen da, eta Gipuzkoako Foru Aldundia, Taupa Euskaltzaleen Mugimendua, Badalab, Soziolinguistika Klusterra eta Antzuolako Udala dira babesleak. Antzuola, Aia eta Añorga aukeratu ziren lurralde barruko herri-pilotu gisa, euskararen ulermena orokortzeko eta erabileraren aldeko kultura indartzeko.
Lehen ikasturte honetan, hamazazpi antzuolarrek hartu dute parte uler-saioetan, gehienak adinekoak, baina baita gurasoak eta hainbat sektoretako langileak ere. Bederatzi hilabetez, astean behin, bi orduko saioak egin dituzte, metodologia berritzaile bat erabiliz. Helburua da euskararen ulermena modu azkar eta praktikoan garatzea, parte-hartzaileek euskaraz hitz egin beharrik izan gabe, ingurune babestu batean euskarazko mezu ulergarriak jasoz eta eguneroko egoeretara gerturatuz. Bigarren ikasturtea datorren irailean hasiko da.
