Gipuzkoako eskubaloi federazioaren denboraldi amaierako galak sari ugari utzi ditu Oñatiko Aloña Mendi klubarentzat. Bost hamarkada bete dituen klubak omenaldi berezia jaso du, eta horrez gain, beste hiru sari ere eskuratu ditu: Iñaki Canteroren ibilbideari emandako zilarrezko insignia, bigarren talde senior gizonezkoaren kiroltasunaren saria eta Unax Aranburu jokalariaren lehen territorial mailako golegile nagusiaren aitorpena.
Iñaki Canterok ezin izan zuen bere izenean jaso insignia, osasun arazoengatik. José Miguel Gartzia 'Tuki' eta Iñaki Mendarozketa zuzendariek jaso zuten saria beraren ordez. Cantero, Oñatiko eskubaloian erreferentea dena, pozik agertu zen omenaldiarekin, nahiz eta ekitaldira joan ezin izan. 'Espinita dut joan ezin izanagatik, ilusioa egiten zidan, baina ezin denean, ezin da', adierazi zuen.
1978an hasi zen kirol eskolan, eta geroztik Aloñako eskubaloi eskolan ibili da, klubari eta harrobiaren lanari dedikatuz. Bergara taldean ere egon zen urte batzuetan, baina 1978tik 1995era bitartean, Aloñara itzuli zen eta otsailera arte aritu zen lanean harrobiarekin. 'Osasun arazoek ez didate uzten %100ean egotea, beraz, 47 urteren ondoren, 'erretiratzeko' ordua iritsi da', azaldu zuen. Federazioko teknikoa ere izan zen urte luzez, Gipuzkoako infantil nesken selekzioarekin eta teknifikazioetan.
Canteroren palmaresean hainbat Gipuzkoako eta Euskadiko txapelketa daude, baita Espainiako Txapelketarako sailkapenak ere 1985, 2000 eta 2002an. Kadete nesken taldearekin brontzea lortu zuen Mallorcan 1998an. Entrenatzaile lanetan ezaguna den arren, jokalari ere izan zen, Granadan militar-zerbitzuan zela Andaluzia txapelketako txapeldunorde izan zelarik.
