Igor Herrartek, Mondragon Assembly-ko presidente izandakoak, hartu du Joxean Alustiza ren lekukoa Fagor Taldeko presidentzia berrian. Alustizak, bere agurraldian, 2025eko ekitaldia 1.735 milioi euroko salmentekin itxi zela adierazi zuen.
Alustizak azpimarratu zuen Fagorren kooperatibek "egoera zailak aurrera ateratzeko gaitasuna berretsi dutela, erronka ezberdinen eskakizunetara egokituz". Nazioarteko testuinguruak merkatu-ezegonkortasuna sortu duela gaineratu zuen, baina taldeko kooperatibek "erabaki garrantzitsuak hartzeko gaitasun handia" erakutsi dutela nabarmendu zuen. "Lasai joaten naiz, jakinda Fagorrek bere esentziari eusten diola, eta pozik, gurea den proiektu kooperatibo honek etorkizun handi eta oparo bat duela ikusten dudalako", esan zuen.
Fagorren ordezkariek azaldu dutenez, nazioarteko egoerak zuzenean eragin die hainbat sektoretan, eta horrek egokitzapen-gaitasun handia eskatu die kooperatibei. Adibidez, Txinako enpresen sarrera dela eta, Europako merkatuan, kooperatibek berrikuntzera jo behar izan dute beren estrategiak eta lan egiteko moduak egokituz. Fagor Ederlan ek, esaterako, laster hasiko da Leapmotor markako auto elektrikoen modelo batzuen osagai estrukturalak hornitzen, eta horrek Zaragozako produkzio-planta berrirekitzea ekarri du.
Fagorren kooperatibek beren dibertsifikazio-estrategietan aurrera egiten jarraitu dute. Horren adibide da Fagor Arrasate k, Funditec ikerketa-zentroarekin batera, robot humanoide industrialak diseinatu, garatu eta fabrikatzeko egindako apustua.
Fagorrek bere konpromiso sozialari eusten dio, bere irabazien %12 horretara bideratuz. 2025ean, 3,1 milioi euro lagundu zituen hainbat mailatako gizarte-proiektuetara (Fagor komunitatea, Debagoiena, Euskal Herria eta mundu mailan). Besteak beste, Debagoienako Tokixan elikadura burujabetzarako ekimena, eskualdeko hezkuntza-proiektu ugari, Argitzen trantsizio energetikorako herritarren gogoeta-prozesua, Arizari (ikastola Arizmendi), Haize Berri eta Shifa ren proiektu sozialak, eta Fundación Mundukide bultzatu zituen.
