Iban Larreboure (Urruña, 1983) bateria-jotzaileak 11 urterekin hasi zituen bateria-ikasketak, eta gaur egun hainbat taldetan parte hartzen du, hala nola Zetak eta JAC Electric. Azken talde honekin Arrasate Blues jaialdian arituko da laster.
Larrebourek Zetak-en esperientzia nabarmendu du, batez ere San Mames en eskainitako Mitoaroa III ikuskizunaren ostean. "Hilabete askotako lana eta pertsona askoren ahalegina" izan dela adierazi du, eta musikari moduan horrelako esperientzia bat bizitzea "ikaragarria" dela gaineratu du. "Sorkuntzari mugarik jartzen ez dion lantaldea da Zetak, eta beti aurrera egiteko mugimendua du", azpimarratu du.
Proiektuarekin 2019ko udan elkartu zen, eta harrezkero talde handi bat osatu dute. Larrebourek dioenez, taldeak "mezu oso garrantzitsua" plazaratzen du, "euskararen, kulturaren eta Euskal Herriaren nortasunaren inguruan".
Bestalde, JAC Electric taldea Jaime Alvarez ekin izandako "topaketa polit" bat dela azaldu du. "Hasieratik sortu zen konexio berezi bat bion artean, bai pertsonalki eta bai musikalki ere", esan du. Blues rock estiloan kokatzen da taldearen musika, eta iaz argitaratutako Now diskoa izango da errepertorioaren oinarria.
Larrebourek bi proiektuak "berdin maite" dituela dio, "garrantzitsuena da egiten den horretan sinestea". "Ez dut inoiz egin benetan sinesten ez nuen zerbait; nahiago dut proiektu bati ezezkoa eman baiezko txiki bat eta erdipurdi jardun baino", adierazi du.
Arrasate Blues jaialdira joateko "izugarrizko gogoa" duela aitortu du, iaz ekaitzaren eraginez jo ezin izan ostean. Aurten, JAC Electric taldeak "formatu elektrikoan joko du, hirukote moduan", eta blues kantu batzuen moldaketekin osatutako errepertorioa aurkeztuko dute. "Beharrezkoak dira halako ekimenak", gaineratu du.
Gainera, EHZ jaialdia ren garrantzia azpimarratu du, "gaztetatik oso presente" egon den jaialdia dela esanez, eta "sekulako taldeak" ikusi izan dituela bertan.
