Floreagako bolatokian 58 bolari elkartu ziren maiatzaren 30ean, Hiru Txirlo txapelketako hamargarren eta azken jardunaldia jokatzeko. Bertan, Jokin Arrizabalaga (Lastur) eta Jabier Osoro (San Migel) izan ziren onenak, bakoitzak 7 txirlo botata. Arkaitz Rodriguez (Asola Berri) izan zen hirugarren, 6 txirlorekin.
Txapelketa orokorra, berriz, Gorka Madinabeitiak irabazi du, sailkapen nagusian 36 txirlo pilatuta. Azken jardunaldietan gerturatu den Jabier Martino (Soraluze) izan da bigarren, 33 txirlorekin, eta Garikoitz Rodriguez hirugarren, 32rekin.
Emakumezkoetan, Enara Montiel ek erakutsi du nagusitasuna, 22 txirlorekin irabaziz. Atzetik geratu da Isana Gorosabel (UDA), 16 txirlorekin. Adinekoen mailan, Bittor Astigarraga izan da garaile (30 txirlo), eta bigarren Jabier Osoro (26 txirlo). Kategoria txikienetan, Ander Unamuno (infantil, 11 txirlo), Luken Martino (alebin, 13 txirlo) eta Axel Sixto (UDA, benjamin, 14 txirlo) izan dira onenak.
Taldeka, Asola Berri k eskuratu du txapela 115 txirlorekin, San Joxepe (113 txirlo) eta Elgeta (109 txirlo) taldeen aurretik. Bikoteka, berriz, Bittor Astigarraga eta Bittor Ugarteburu izan dira indartsuenak (55 txirlo), Asier Azkarate eta Mikel Almorza (San Joxepe) izan dira bigarren (53 txirlo).
Herrika ere sariak banatu dira: Gorka Madinabeitia (Aretxabaleta), Gorka Bereziartua (Elgeta), Mikel Almorza (Bergara), Jabi Martino (Soraluze), Xabier Loiola (Elgoibar), Erik Muñoz (Floreaga) eta Gotzon Uranga (Lastur) izan dira beren herrietako onenak.
Txapelketa amaituta, Lehendakari Saria jokatuko da datorren larunbatean, ekainaren 6an, Eibarko Asola Berri ko bolatokian, 12:00etan. Ondoren, bazkaria izango da eta Bittor Astigarraga, Bitor Ugarteburu eta Jose Angel Astigarraga omenduko dituzte. Azkenik, Gipuzkoako txapelketako sariak banatuko dira.
