Atzoko jardunaldian, Azkoitiko Floreaga, Bergarako San Joxepe, Eibarko Asola-Berri, Elgoibarko San Migel, Aretxabaletako UDA Hirutxirlo, Elgeta, Lastur eta Soraluzeko Ezozi nahiz San Andres taldeetako ordezkariak aritu ziren lehian. Azken jardunaldi honetan, Lasturko Jokin Arrizabalagak eskuratu zuen garaipena, eta San Migel taldeko Jabier Osoro eta Asola Berri ko Arkaitz Rodrigez sailkatu ziren ondoren.

Martxoan hasitako txapelketak bederatzi jardunaldi izan ditu guztira, eta atzokoa hamargarrena izan zen. Horrenbestez, erabakita geratu da zeintzuk diren Gipuzkoako txapelketaren 55. edizio honetako irabazleak. Gizonezkoetan, UDA taldeko Gorka Madinabeitia izan da nagusi, eta emakumezkoetan, berriz, Asola Berri ko Enara Montiel ek eskuratu du garaipena. Gizonezkoetan, bigarren eta hirugarren postuetan Javi Martino (Ezozi) eta Garikoitz Rodriguez (Asola Berri) sailkatu dira; eta emakumezkoetan, Isana Gorosabel (UDA) eta Olatz Arano (San Joxepe) izan dira bigarren eta hirugarren.

Atzoko jardunaldiaren ostean, bikotekako, taldekako eta mailaz mailako sailkapenak ere zehaztu ziren. Azpimarratzekoa da Azkoitiko Floreaga taldeko bolari batek ere ez duela lortu lehen hiru postuetan sartzerik sailkapen orokorrean.

Datorren asteburuan, berriz, Eibarko Asola Berri bolatokian ospatuko den Bolari Eguna izango da hurrengo hitzordua. Bertan, txapelketako lehen 64 postuetan sailkatutakoek Lehendakari Saria jokatuko dute. Denboraldiari amaiera emateko, bazkari bat antolatu da Eibarko jatetxe batean, eta otorduaren ondoren banatuko dira sariak. Ekitaldi honetan, omenaldi berezia jasoko dute Eibarko Bittor Astigarragak, Bittor Ugarteburuk eta Jose Angel Astigarragak.