Arrasateko EAJ k ohar bidez aurkeztu du Muzibar-San Frantzisko proiektua, "Zarugalde ingurua eraldatzeko eta herriko mugikortasuna hobetzeko proposamena, etorkizuneko ikuspegi integral batekin". EAJko bozeramaile Ander Garay k adierazi duenez, Arrasatek datozen 20 urteetarako pentsatutako eraldaketa behar du, "soluzio integral, irisgarri eta konektatuak" eskatuz.
Plana mugikortasun "jasangarriago, irisgarriago eta ordenatuago baten" aldeko apustua egiteaz gain, bizilagunen bizi kalitatea mantentzea du helburu, etorkizunerako hobeto prestatutako hiri espazio, aparkaleku eta konexioak bermatuz. Talde jeltzaleak urteetan landutako eredu bat defendatzen du, fase eta irtenbide desberdinekin konektatuta, datozen hamarkadetan Arrasateren benetako beharrei erantzuteko pentsatua. Proposamenak EAJk herrian mugikortasunaren eta hiri-berroneratzearen arloan aurretik defendatu duen ildoari jarraitzen dio.
Proiektuaren "jarduera estrategikoak" honako hauek dira: Zarugalde erabat oinezkoentzat bihurtzea, espaloiak handitzea Otalora kalean, Arbolapeta eta San Frantzisko arteko lotura hobetzea, lurpeko aparkaleku berria Kondekuan –Monterron aurreko berdegunean– eta Monterron parkearen birdiseinua.
Garay ren esanetan, hiri-berroneratzea ezin da jarduera isolatuetan oinarritu, "jasangarritasuna, irisgarritasuna, mugikortasuna eta herritarrentzako zerbitzuak uztartzen dituen estrategia koherente batean" baizik. "Arrasatek biharkoan pentsatzen duten proiektuak merezi ditu", gaineratu du, udalerri erosoagoa, irisgarriagoa eta etorkizunerako prestatuagoa eraikitzeko helburuarekin.
EAJk Zarugalde kaleko azken esku-hartzea kritikatu du, "ikuspegi orokorraren falta" leporatuz. Talde jeltzalearen arabera, EH Bilduk bultzatutako jarduerek, hala nola oinezkoentzako erabilera eta aparkaleku-plazak kentzeak, "adabakietan oinarritutako kudeaketa" erakusten dute, eta ez egiturazko irtenbideetan oinarritutakoa. Horren harira, 40.000 euro inguru Zarugaldeko margoketara bideratzea deitoratu du, "arazoak konpontzen ez dituzten neurriak" direla argudiatuz.
