Debagoieneko Mankomunitateak nabarmendu du udalen tokian tokiko mugikortasun lanketen osagarri izan nahi duen azterketa bat egin dutela. Diagnostikoak mugikortasunaren "argazki osoa" eskaintzen duela azpimarratu dute, eta horren harira, mugikortasun-mahaia eratzea ezinbestekotzat jo dute.
Datozen asteetan, Mankomunitatea eragile ezberdinekin harremanetan jarriko da mugikortasun-mahaia eratzeko. Diagnostikoak utzitako ondorioetako bat da Debagoiena ez dela homogeneoa mugikortasunari dagokionez.
Azterlanak lau arrakala estruktural identifikatu ditu, datozen planek heldu beharko litzaiekeenak: lurralde-arrakala, periferiaren isolamendua nabarmenduz; arrakala soziala, autoa ez dutenen bazterketa aztertuz; genero-arrakala, gizonezkoen eta emakumezkoen joan-etorrien arteko desberdintasunak aztertuz (haurrekin ikastetxera edo ospitalera joan-etorriak barne); eta arrakala digitala, adinekoentzat teknologia oztopo izan daitekeela kontuan hartuta.
