Hariak Estrategiaren lehen ekintza planaren barruan kokatzen den dekalogo honek, bakardadeari aurre egiteko ekosistema bat eraikitzea du helburu, eragileen arteko koordinazioa ahalbidetuz. Hamar gako nagusik osatzen dute gida hau, norberak bakardadeari aurre egiteko eta besteen bakardadea arintzen laguntzeko gomendio sorta bat eskainiz.
“"Harreman osasuntsuak mantentzeko, sortzeko eta sendotzeko norberak bakardadeari aurre egiteko eta besteen bakardadea arintzen laguntzeko gomendio sorta baten bitartez."
Dekalogoa aurkeztu ondoren, hurrengo urratsa Debagoieneko herritar guztien artean banatzea izango da. Arrasateko Udaleko Ongizate zinegotziak adierazi duenez, datozen asteetan egingo da banaketa, eta gida euskaraz zein gaztelaniaz irakurri ahal izango da, eskualdeko biztanle guztien eskura egon dadin. Gidak modu adierazgarri eta bisualean eginda dagoela azpimarratu da, eta jasotzen diren hamar gakoak zuzenak eta argiak direla.
Dekalogoaren aurkezpenarekin, Debagoiena Ehuntzen proiektuaren lehen fasea amaitutzat eman da. Fase honetan, bakardadearen inguruko diagnostiko bat osatu da informazioa biltzeko. Bakardadea existitzen dela ikusita, komunitatetik arazoari erantzuna emateko aukera badagoela nabarmendu da, eta horretarako bide-orri bat sortu da etorkizunerako sare bat ehuntzen hasteko.
“"Onartu dugu bakardadea existitzen dela, eta onartzen dugu komunitatetik eta kolektibo bezala badugula aukera horri erantzuteko. Hortaz, bide-orri horretan irudikatzen duguna da ekintzekin jardutea: esku-hartze zuzena izatea eta denon artean bakardade horri erantzunak ematen saiatzea."
