Ekimen honek Angiozar auzoari bere kudeaketa propioa izateko aukera emango dio, Bergarako parte izaten jarraituz. Batzorde sustatzaile berezi bat osatuko da, Bergarako alkateak, Angiozarko alkateak, udalbatzako alderdi politikoetako ordezkariek eta auzotarrek osatuta, prozesua bideratzeko.
“"Azkenean, norbait izatea da guretzat. Orain arte, beti ibili behar izan gara aurkezterako orduan Bergara bezala, eta orain, entitate txiki bat gara. Angiozarrek bere burua edonon aurkeztu dezake. Bidea zabaltzen digu dirulaguntzetara aurkezteko batik bat. Guk edukiko genuke beste ildo bat, Bergarako udaletxeak berea eta guk gurea."
Alderdi politikoek ere pozik agertu dira erabakiarekin, eta datozen hilabeteetan prozesuak aurrera egitea espero dute. EH Bilduko bozeramaile batek adierazi duenez, Angiozarrek aukera izango du eskumen eta baliabide gehiago lortzeko, tokiko kudeaketa hobetzeko eta auzoaren beharretara hobeto egokitzeko. Lehen urratsa erabaki organoa eratzea izango da.
Bestalde, udalbatzak plan ekonomikoa ere onartu zuen, nahiz eta EH Bilduren eta EAJren artean eztabaida sortu. EH Bilduk azaldu zuen 2025ean mailegu bat eskatu behar izan zutela inbertsio handiak finantzatzeko, eta horrek 2026rako foru araua betetzeko plan ekonomiko-finantzario bat egitera behartu zituela. Plan hori Aldundiarekin batera egin dela eta finantza egonkortasuna lortzeko bidea emango duela azpimarratu zuten.
Jeltzaleek, berriz, udal gobernuaren kudeaketa kritikatu zuten, HAPOa eta Mugikortasun Plana ez egitea leporatuz, eta Martokoako berrurbanizazio lanen atzerapena ere aipatu zuten. EH Bilduko bozeramaileak erantzun zuen Martokoako obra prezio berrikusketa batean dagoela, baina udal gobernuaren helburuen barruan sartzen dela eta 2027 baino lehen hasiko dela.
Alderdi Sozialistak, aurrekontuen onarpenean bezala, erne jarraituko duela berretsi du, udalaren egoera ekonomikoa kontuan hartuta. Denbora emango dietela adierazi dute, eta geroago baloratuko dutela udal gobernuaren politika.
