Kirol-jardunaldia ostiralean hasiko da, 16:00etatik 20:00etara bitartean, 3x3 modalitateko norgehiagokekin. Adin eta kategoria ezberdinetako jokalariek parte hartuko dute hasierako saio honetan, hockeya herritarren artean sustatzeko helburuarekin.
Larunbatean, 09:00etatik 19:00etara, txapelketa nagusia jokatuko da. Bertan, Burdinola talde antolatzaileak, Street Hockey Gasteiz taldeak eta Valladolid zein Aragoi erkidegoetako taldeek parte hartuko dute. Partidak 20 minutukoak izango dira eta 15:00etatik aurrera fase finala erabakiko da.
Ekimen hau Bergara Hiria programaren barruan kokatzen da, emakumezkoen kirol federatua ikusarazteko eta sustatzeko asmoz. Bergarako Udalak babestutako ekitaldi honek kirol modalitate honen garapena bultzatu nahi du eskualdean.
