Hasiera batean apirilaren 15ean, osteguna, Idoia Asurmendi eta Maria Osesen ikuskizun batekin irekitzekoa zen Nazioarteko Liburuaren Egunaren inguruko ospakizunak, baina azken hori bertan behera geratu da. Hala ere, Arrasateko Udal Bibliotekak egitarau zabala prestatu du datozen egunetarako.
Datorren apirilaren 24an, ostirala, arratsaldeko 18:00etan, Iparraldeko Arantxa Hirigoyen eta Philippe Albor musikariak izango dira protagonista. Haiek 'Ttinka' izeneko ikuskizuna eskainiko dute, kantua, musika, ipuinak eta antzerkia uztartzen dituena. Euren kantu guztiak propioak dira, eta gehienak proiektu honetarako espresuki sortuak. Diskoak ere argitaratuta dituzte.
“"Ilusioa egiten digu Iparraldeko artistak ekartzea; ez da ohikoa eta gertu egon arren, errazago jotzen dugu gertuko herri eta lurraldeetara."
Haurrentzako ikuskizun honetaz gain, bibliotekak beste bi hitzordu ere antolatu ditu. Batetik, helduentzako 'Mikroipuinak' tailerra, idazketa lantzeko saioa. Idoia Torregaraik, idazle eta kazetariak, gidatuko du bi ordu inguruko tailer hau. Torregaraik iaz argitaratu zuen Mikroipuinak liburua, eta ordutik ipuin laburrak sortzeko tailerrak ematen ditu. Apirilaren 27an, astelehena, arratsaldeko 18:00etan izango da, eta 16 urtetik gorako edonork parte hartu dezake. Izena eman behar da webgunearen bidez edo liburutegian bertan.
Bestetik, Santa Marina auzoko haur liburutegian, Helena Azkarragaurizar marrazkilariak haurrekin irudiak sortzeko tailer praktiko bat gidatuko du, 'liburu bat maleta bat' izenekoa. Tailer hau apirilaren 23an, arratsaldeko 18:00etan egingo da, eta lehen hezkuntzako haurrentzat (bereziki 6-10 urtekoentzat) da egokia. Hemen ere aurretik izena eman behar da, oraindik lekuak baitaude.
