Udaberriko ziklo musikala aurrera doa eta Arrasate Musikalek ekainean zehar luzatuko den egitarau zabala prestatu du. Guztira, 18 emanaldi izango dira, hainbat instrumentu eta talderen parte hartzearekin. Gainera, Elkartasun Eguna ere ospatuko da, musika eta kalejira uztartuz.

Ekainaren lehen asteburuan hainbat ekitaldi izango dira. Ekainaren 4an, ostegunean, klarinete ikasleak arituko dira JAMEko Auditorioan, 18:30ean. Hurrengo egunean, ekainaren 5ean, hezkuntza anitzeko ikasleen txanda izango da toki berean, 18:00etan. Arratsaldean, Dhuma Combo taldeak joko du Mondragon Hotelean, 19:00etan.

Astea borobiltzeko, ekainaren 6an, larunbatean, Elkartasun Eguneko kontzertuaz gain, gaita ikasleek kalejira egingo dute erdigunean, 12:00etatik aurrera. Hauekin batera izango dira Lore gazteak, Txikitxu Arrostaitz, Arrasateko Erraldoi eta kilikien konpartsa, Arrasateko Txalaparta taldea eta Arrasateko Gaiteroak.

Ekaineko egitarauak hainbat kontzertu gehiago biltzen ditu, hala nola biolin, tronpeta, biolontxelo, gitarra eta piano emanaldiak Musika Eskolan, baita dantza emanaldia eta kantu zein perkusio kontzertuak ere. Hilabetea Amaia Antzokian izango den kurtso amaierako kontzertu nagusiarekin amaituko da, ekainaren 19an, 19:00etan.