Joan den abenduan onartutako 2026ko Udal aurrekontuari, 13.130.000 eurokoa zena, hiru milioi euro gehiago gehitu zaizkio kreditu txertaketa baten bidez. Erabaki hau Udalbatzak hartu zuen, 2025eko likidazioaren ondoren 7.800.000 eurotik gorako gerakina zegoela ikusita.
“"Kreditu horiek 2025eko likidazioa itxi ondoren sartu dira; urte hori azken hamarkadako gastu eta inbertsio mailarik altuenarekin amaitu da, 14,3 milioi euro, eta horietatik 3,4 milioi euro zuzenean inbertsioetara bideratu dira."
Gehitutako kreditu hauen helburua da amaitzear edo amaituta dauden proiektuen obrak ahalik eta azkarren hastea, baita proiektu berriak abian jartzea edo idazketa fasean daudenak finantzatzea ere. Lehentasunen artean, Iturrigorri pilotalekua eraberritzeko lanak nabarmentzen dira, aldagelak egokitu, harmailak handitu eta bainugela publikoa sortzeko asmoz. Era berean, Andramari auzunea urbanizatzeko partida eguneratuko da, aurreko lizitazioa hutsik geratu baitzen.
Udal eraikinetan ere hobekuntzak egingo dira. 320.000 euro bideratuko dira udaletxean igogailu bat jartzeko eta sarbide-eremua hobetzeko, leihatila bakarra sortuz. Herriko Plazako bainugela publikoa ere berrituko da. Beste udal eraikin batzuetan ere konponketak egingo dira, hala nola kuartel zaharrean, egitura eta teilatua hobetuz, eta beste hainbat eraikin “erabilera berrietara” egokitzeko.
Gainera, urbanizazio lan txikiak ere aurreikusten dira, hala nola mugikortasun planean proposatutako neurriak gauzatu, komentuko lorategian aldaketak egin eta plazan zuhaitzak birlandatu. Beste kreditu batzuk ere onartu edo egokituko dira, besteak beste, txoko feminista berrirako inbertsioak, fatxadak garbitzeko lanak, Loramendi kaleko atzealdea konpontzeko proiektua idaztea eta lorategi berriak sortzea.
EAJk kontrako botoa eman zuen kreditu txertaketaren aurrean, hiru arrazoi nagusi argudiatuz. Batetik, kreditu gehigarrien atzean dauden proiektuen lanketa falta salatu zuten, eta bestetik, autokarabanen ur zikinak botatzeko puntuaren eta Gipuzkoa plazan gune estalia jartzeko bigarren proiektuaren aurka agertu ziren, lehentasuna ez zirela iritzita. Azkenik, 2026ko hasierako aurrekontuan EAJk proposatutako hainbat neurri ez zirela jaso adierazi zuten, hala nola paretak garbitzeko partida edo Lausittako proiektua idazteko partida.
