Elkarteko kideek azpimarratu dute Palestinan genozidioak aurrera darraiela, eta politika sionistek bertako herritarren desplazamendu behartua eragin dutela. Iranen aurkako gerra hasi zenetik erasoak areagotu egin direla gaineratu dute.
“"Tiroketak, etxeen eta kotxeen suteak, olibondoen uzten suntsiketa, ganadu lapurreta... Hitz batez, palestinarren etorkizuna suntsitzen jarraitzen dute."
Israelen politika sionisten ekintzak ere arbuiatu dituzte, hala nola palestinar presoen aurkako heriotza zigorra errazteko legea, Libanoko hegoaldea eta Siriaren zati bat bereganatu izana, eta Netanyahuk Libanon bake akordiorik ez onartzeko adierazpena.
Nazioarteko beste gatazka batzuk ere gogora ekarri dituzte, besteak beste, Ukrainakoa, Irangoa, Kubakoa eta Venezuelakoa. Elkarteak argi utzi du egoera horiek salatzean ez dutela erasotuak diren herrien gobernuen izaera defendatzen, baizik eta potentzia handienek ez dutela eskubiderik beste herrien etorkizuna indarrez inposatzeko.
“"Mendebaldeari gure ekonomian eta bizi baldintzetan izango duen eraginak bakarrik ardura dio, argi utziz zein den gure zoru etikoa, gerraren etika faltari eta ilegalitateari baino gehiago gure poltsikoari begiratuz."
Azkenik, Frantzia eta Alemaniako gobernuek soldaduskaren berrezartzeko egiten ari diren ahaleginaren aurrean adi egoteko deia egin dute, eta Antzuola militarismoaren aurka dagoela gogoratu dute. Iraganean ere, derrigorrezko soldaduskaren aurka agertu zirela eta gazteen borrokari esker bertan behera geratu zela azpimarratu dute.
