Bergaran ospatu da aurten lehen aldiz Wolframioaren Eguna, Udalak eta Museo Laboratorium-ek bultzatutako ekimena. Ekitaldi honek Elhuyar anaien aurkikuntza zientifiko garrantzitsua ezagutzera ematea du helburu, wolframioa isolatu baitzuten duela 243 urte.
Ekitaldi honetan, Jesus Ugalde, Euskal Herriko Unibertsitateko (EHU) Fisika Kimikako katedradunari, 'Bergara Enbaxadore 2026' saria eman zaio, bere ibilbide zientifiko nabarmena aitortuz. Era berean, wolframioari eskainitako mural bat inauguratu da.
Juan Ignacio Pérez Iglesias, Zientzia, Unibertsitate eta Berrikuntza sailburuak, Gorka Artola alkateak eta Rosa Errazti Museo Laboratorium-eko zuzendariak parte hartu dute ekitaldian. Sailburuak Elhuyar anaien aurkikuntzaren balioa eta zientziaren historiaren pasarte hau ezagutzera ematearen garrantzia azpimarratu ditu.
Pérez Iglesiasek nabarmendu duenez, Juan José eta Fausto Elhuyar "beren garaiko gizon ilustratuak" izan ziren, "zientzialari kosmopolitak", eta beraien konpromisoa Euskadirekiko "haien jarduera zientifikoan" islatu zen, Euskalerriaren Adiskideen Elkartean, hain zuzen ere.
Jesus Ugalderen ibilbidea ere goraipatu da, EHUko Fisika Kimikako katedraduna, "zientzialari bikaina", "akademiko eredugarria" eta "bere herriarekin eta hizkuntzarekin konprometitua" dela esanez. Bergarako 'Enbaxadore' izendapena "justiziaz" jaso duela adierazi du.
Azkenik, Elhuyar anaiak eta Jesus Ugalde "kosmopolitak" direla azpimarratu du, eta denek lagundu dutela Bergara, Gipuzkoa eta Euskadi "mugaz haraindi ezagutarazten" zientziaren lurralde gisa.
Saria eman ondoren, wolframioa isolatzeari eskainitako mural bat inauguratu da Seminarixoa-ko arkupetan. Jokin Oregi, Sortwo eta Mikel Larrañaga, Remak artistek sortutako obra honek aurkikuntza horri begirada artistiko berri bat eskaintzen dio.
