Debako Kultur Elkartearen Bazkide Eguna ospatu zen joan zen larunbatean, eta ekitaldi nagusia Jose Manuel Ostolazaren omenezko sarien banaketa izan zen. Sari hauek herriko kultur jarduera aberasten duten pertsona eta erakundeen lana aitortzeko sortu ziren.
Ekitaldiari hasiera emateko, Jose Manuel Ostolazaren bizitzaren eta ibilbidearen errepaso laburra egin zen. Ondoren, Debako Kultur Elkarteko zuzendaritzako kideek hitza hartu eta haren omenezko lore-sorta eskaini zioten.
Aurtengo Sortzaileak Saria Willy Berasaluze artistak jaso zuen. Eskulturan, collagean eta argazkilaritzan egindako lanari esker, bere aztarna utzi du herriko hainbat txokotan. Berak sortu zituen Ostolaza Sarien eskulturak, eta horrek esanahi berezia eman zion aitortzari.
Dinamikak Saria Aitzuri Abesbatzarentzat izan zen. 1994an sortutako talde honek ehunka ahotsekin musikaren bidez herritarrak elkartu eta hunkitzeko gaitasuna erakutsi du.
Ezinbestekoak Saria Zuhatza Euskara Elkarteak jaso zuen, 1997az geroztik Deba euskaldunago baten alde lan egin eta euskararen erabilera sustatzeko egindako lanagatik.
Hazia Saria Nerea Loiola idazleari eman zioten. Ingeniaritzatik literaturara egin zuen jauzia eta euskal literaturan leku nabarmena lortu du.
Azkenik, Sari Berezia Skabidean musika taldeak jaso zuen, ska, reggae eta rocksteady erritmoen bidez konpromiso soziala eta euskal kultura zabaltzeagatik. Taldeak kanta bat ere argitaratu du Jose Manuel Ostolazaren omenez.
Sari-banaketa ekitaldian hainbat kultur sortzaileren emanaldi laburrak ere izan ziren, besteak beste, Gure Kai dantza taldea, Josu Salegi eta Miguel Laguna musikariak, Aitzuri Abesbatza, Skabidean taldea, Iturrian Korua eta Rafael Bravo idazlea.
