Apirilaren 16tik 30era, 'Karteletrak' erakusketa izango da ikusgai Zabiel kultur etxean. Erakusketaren inaugurazioa apirilaren 16an izango da, arratsaldeko 18:00etan, eta Joseba Sarrionandia idazleak hartuko du parte, erakusketaren antolaketan izan duen paper garrantzitsua dela eta.

Erakusketa honek Markos Gimeno (Ermua 1974 - Eibar 2018) sortutako palindromoak eta horiek ilustratzeko hainbat artistek egindako kartelak biltzen ditu. Palindromoak ezkerretik eskuinera eta alderantziz berdin irakurtzen diren hitz eta esaldiak dira. Markos Gimenok gaitasun berezia zuen horiek sortzeko, eta erakusketa hau bere omenezko omenaldi bat da. Joseba Sarrionandiak, gainera, 'Markos Gimenoren 101 letrakartel' liburua argitaratu zuen, Markosen palindromoen artean 101 aukeratuz eta glosatuz.

Erakusketa honekin lotuta, apirilaren 24an, 19:00etan, Mursego ren 'Sukramarkus: Markos Gimenoren palindromoen berrirakurketa librea' kontzertua izango da Zabielen. Emanaldirako sarrerak 3 eurotan eskuratu ahal izango dira mutriku.eus webgunean edo Turismo bulegoan, apirilaren 14tik aurrera.

Bestalde, apirilaren 18an, Merkatu txikiarekin batera, Onintza Enbeita idazlea izango da Beheko Plazan, 12:30ean, 'Bizitza baten txatalak' liburua aurkezten. Liburu honetan, Enbeitak Feli Madariaga ren bizitza kontatzen du, baserriari eta lurrari lotutako emakume baten istorioa.

Ekitaldi gehiago ere izango dira: apirilaren 23an, 'Habiko ipuinak' umeentzako ipuin musikatua eskainiko da Liburutegian, Amaia Elizagoien kontalariaren eta Itziar Olague musikariaren eskutik. Apirilaren 28an, Katixa Agirre idazlea izango da Liburutegian, 18:00etatik aurrera, 'Barne Zerbitzuak' bere azken lana aurkezten. Nobela honek 1937-1943 urteetara garamatza, sasoi ilun hartan beren bizia jokatuz beste askorenak salbatu zituzten emakume ausart batzuei buruzkoa.

Liburu aurkezpenaren ostean, IX. Ziriako Andonegi Mikroipuin Lehiaketako sariak banatuko dira, aurtengo Liburu Hilabetearen egitarau zabala borobiltzeko.