Maiatzaren 21eko goizean, Eibarko Epaitegiaren aginduz, Ertzaintzak gaztetxea hustu zuen. Kideek jakinarazi dutenez, ez zuten aurretiazko abisurik jaso. Hustuketa hasi zenean, gaztetxera sartu nahi zuen edonori bidea moztu ziotela salatu dute, baita bizilagunei ere. Operatiboaren arduradunarekin hitz egin ondoren, hiru pertsonari soilik utzi zieten gaztetxera sartzen materiala ateratzeko, "bi neska eta mutil bat", gaztelania hutsean. Gainera, lau lagun identifikatu eta bati isuna jarri zioten goizaldean.

Ekainaren 5eko prentsaurrekoan, gaztetxeko kideek Ertzaintza, Udala eta Amenabar enpresa kritikatu zituzten. Udalari leporatu diote "sozialki eta politikoki konprometiturik dagoen espazioa" ez zaiola komeni eta "herri eredu ustel honetan" ez dagoela autogestiorako tarterik. Ertzaintzari, berriz, bortizkeria, jazarpena eta "erdara hutsean" aritzea leporatu diote.

Gaztetxekoek aspalditik ohartarazi dute desalojoaren atzean Amenabar eraikuntza enpresa eta udala daudela. Salatu dute Amenabarrek gaztetxe inguruko auzoaren %60-70aren jabe dela eta udalak, enpresarekin harreman estuan, auzoaren "modernizazio" plan bat aurrera daramala, gazteen arabera espekulazio plana dena.

Prentsaurrekoan deitoratu dute Eibarren egiten diren "obra publiko eta pribatu gehienen exekutatzaileak berdinak" izatea, eta azpimarratu dute "nork duen boterea Eibarren, eta beste askok zeri dioten beldur" agerian geratu dela berriro.