Datorren urtean hamar urte beteko dira Deban zinema-saioak antolatzen aritu den boluntario-talde bat lanean hasi zenetik. Urtero igande arratsaldero ehun bat lagunentzako edukiera duen aretoa betetzen edo ia betetzen da, eta arrakasta hori zinema antolatzeaz eta "ondo eta egun-eguneko" filmak ekartzeaz arduratzen diren boluntarioei zor zaie.

Arbil elkarte sozialak, herritarren aisialdirako eta bereziki adinekoenetzako egiten duten lan garrantzitsua aitortuz, omenaldia egin die "igandero Deban zinema gozatzeko aukera ematen diguten horiei".

Iñigo Loiola, Patxi López, Begoña Tello, Marian García, Amaia Aldai, Elena Egaña, Mari Carmen Martínez eta Mariaje Carrillo dira duela bederatzi urtetik hona herritarrek zinema ikusteko aukera izan dezaten egindako lana aitortu zaien zortzi pertsonak. Omenaldi hau ez da kasualitatez egin; izan ere, Arbil elkarteak aprobetxatu egin du Zinemaldiko zuzendari José Luis Rebordinos bertan zela, ekitaldi hau aurrera eramateko.

Rebordinos, Arbilen gonbidatuta, Debara joan zen ostegunean hitzaldi bat ematera, egungo zinemari buruz. Jaialdiko zuzendariak azken urteetan ekoizten ari diren filmen kopuruaz, aniztasunaz eta kalitateaz hitz egin zuen, baina bertaratutakoek oso interes handiz jarraitu zituzten anekdota ugari ere azaldu zituen.

Hitzaldia amaitzeko bidean ez zela ikusita, antolakuntzak ohiko galdera-txanda eten behar izan zuen. Izan ere, ostegunean Kultur Elkartean zinema giroa nabaritu zen inoiz baino gehiago.