Elgoibarko Eskola Kirolak bere ikasturteari ekingo dio larunbatean, Mintxetako atletismo pistan egingo den jardunaldi batekin, LH1etik LH6ra bitarteko ikasleentzat. Jardunaldia 09:30etik 11:30era bitartean izango da, eta bertan hainbat probatan arituko dira neska-mutilak.
Antolatzaileek jakinarazi dutenez, parte hartzea doakoa izango da. Hala ere, antolaketa ahalik eta egokiena izan dadin, izena eman duten zein eman ez duten guztiei formulario bat betetzeko eskatu diete. Gaur da horretarako azken eguna, eta bete beharreko galdetegia esteka honetan aurki daiteke: [hemen](https://elgoibarkoeskolakirola.blogspot.com/2026/09/eskola-kirola-irailak-26-atletismo.html).
Aurtengo Eskola Kiroleko programazioak berrikuntza batzuk dakartza. Elgoibar Ikastolako eta Herri Eskolako 6 eta 12 urte bitarteko 270 bat eskola umek parte hartuko dute. Antolatzaileek aurreratu dutenez, talde-kirolen presentzia indartuko da, Elgoibarren sustraituta dauden modalitateei garrantzi handiagoa emanez. Era berean, herrian ohikoak diren beste kirol batzuei ere lekua egingo diete, "ikasleen parte-hartzea eta aniztasuna sustatzeko" helburuarekin.
Jolasak eta kirol alternatiboek ere izango dute lekua egitarauan, jarduera dibertigarriak eta hezigarriak eskainiz, parte hartzaile guztien esperientzia aberasteko.
