Eibarko Udaleko Kontsumitzailearen Informazio Bulegoa (OMIC) Errebal Plazako lokal berri batera lekualdatu da ostegun honetan, urriaren 21ean, zerbitzuaren ikusgarritasuna eta irisgarritasuna hobetzeko. Udalak zerbitzuaren presentzia indartu eta herritarrek kontsumitzaile gisa dituzten eskubideak ezagutzeko baliabideak erraztu nahi ditu.
Jon Iraola alkateak nabarmendu du udal zerbitzuak herritarrei hurbiltzearen garrantzia. "Zerbitzu publikoak gero eta eskuragarriagoak izatea nahi dugu, eta herritarrek beren eskura dituzten baliabideak ezagutzea. OMICek funtsezko lana egiten du kontsumitzaileen eskubideen aholkularitza eta defentsan, eta lekualdatze honek eibartarren artean oso baloratua den zerbitzu baten ikusgarritasuna handituko digu."
Vanesa Hortas Ekonomiaren Garapeneko zinegotziak, berriz, azpimarratu du OMICek "oso arreta baliagarria eskaintzen duela zalantzak argitzeko eta kontsumitzaileei beren eskubideak baliozkotzen laguntzeko". "Errebal Plazara eramanda, zerbitzua indartu eta are gehiago hurbildu nahi diogu herritarrei, Eibarko erreferentziazko gune bat aprobetxatuz, pertsona gehiagok bere lana ezagutu eta behar dutenean jo ahal izateko."
OMICek informazioa, orientazioa eta laguntza eskaintzen du kontratuekin, fakturekin, hornikuntzarekin eta beste kontsumo-zerbitzu batzuekin lotutako arazoetan. Gainera, Kontsumobiderekin, Euskal Kontsumoaren Institutuarekin, koordinatuta lan egiten du.
OMICen jarduerak zerbitzu honen garrantzia islatzen du. 2025ean, bulegoak 1.381 kontsulta jaso zituen eta 220 erreklamazio tramitatu zituen, aurreko urteko 163en aldean, formalizatutako kexen hazkunde esanguratsua izanik.
Telekomunikazioak izan ziren erreklamazio gehien sortu zituen sektorea, guztien %30arekin, ondoren energia, %25arekin. Detektatutako arazo nagusien artean internet eta telebista zerbitzuen gorabeherak, hornikuntza fakturen akatsak, gardentasunik gabeko kontratazioak eta eskatu gabeko zerbitzuengatik kobratzea daude.
Bulegoak informazio-jarduerak ere egin zituen herritarrei beren eskubideak ezagutzen eta erabaki seguruagoak hartzen laguntzeko. Horien artean, abenduan egindako hitzaldi bat nabarmendu zen, elektrizitatearen eta gasaren merkatu librearen eta arautuaren arteko aldeei buruzkoa.
Halaber, aurretiko hitzorduen sistemaren finkatzeak arreta antolatzen hobetzea ahalbidetu du. Telefono bidezko kontsultak 275etik (2024) 594ra (2025) igo ziren, ia bikoiztu eginez, deiak eta erabiltzaileen beharrak modu eraginkorragoan kudeatzeari esker.
Lekualdatzearen harira, OMICek Udaletxeko beheko solairuan zuen aurreko kokalekua utzi eta Errebal Plazako lokaletik emango ditu zerbitzuak. Ohiko ordutegia astelehenetik ostiralera, 09:00etatik 14:00etara da, aurretiko hitzordarekin.
Eibarren erroldatutakoek informazioa eskatu edo hitzordua kudeatu dezakete 943 20 38 43 telefono zenbakira deituta, omic-kiub@eibar.eus helbide elektronikora idatzita edo aurrez aurre Udaletxeko kontserjerian.
