Urduñako Otxomaioetako jaietako ezinbesteko hitzordu bilakatu da Mugalde Elkarteak antolatzen duen herri bazkaria. Auzolanean oinarrituta, ekitaldi honek urtero Gernika Plaza betetzen du. 1999an antolatu zen lehen aldiz, eta 2024an 25. urteurrena ospatu zen. Hala ere, COVID-19aren pandemiaren ondorioz, aurtengoa izango da benetako 25. edizioa, edizio borobila.
Hasiera batean Foru Plazan ospatu ziren lehen hiru edizioak, nahiz eta gaur egun Gernika Plazarekin estu lotuta egon. Elkarteko kide batek azaldu duenez, “nolabaiteko sinbiosia sortu zen ekimen herrikoi berria antolatzeko nahia genuen Mugalde Elkartearen eta herriko sukaldari kuadrilla baten artean”. Lehen edizioan ia 200 lagun elkartu ziren, eta hasieratik aniztasuna izan da bazkariaren ezaugarri nagusia, adin eta kolore politiko guztietako herritarrak bilduz.
“"Hasiera-hasieratik oso bazkari anitza izan da hau; adin eta kolore politiko guztietako herritarrak bildu izan gara, Urduñan bakarrik gerta zitekeen hau."
“Logistika” arrazoiengatik lekualdatu zen bazkaria Foru Plazatik Gernika Plazara. Euriak eragindako arazoen ondoren, Gernika Plazako arkupeak aterpe egokiagoa zirela ikusi zen. Lekualdatu zirenerako, ia berrehun lagunekin hasi zen bazkariak bostehun plateren muga gainditua zuen. Kopuru hori da gaur egun ere muga, Gernika Plazako aterpeetan jende gehiago sartzen ez delako. Azken edizioetan, eguraldi txarra izan arren, giroa beti izan da beroa.
Antolatzaileek sukaldarien lana eskertu dute bereziki. Menua beti izan da antzekoa: lehen platera, bigarrena, postrea, ardoa, ogia eta bazkalosteko kopa. Patatak errioxar erara errepikatzen dira edizio guztietan, baina bigarren platerak aldaketak izan ditu, hala nola arkume saiheskiak edo haragi gisatua. Tokiko produktuak lehenesten dira, haragia Urduñako abeltzainei erosiz, patata arabarra erabiliz, eta ardoa eta ogia hirian bertan eskuratuz.
Bazkariaren antolakuntzan 50 lagun baino gehiago aritzen dira auzolanean, askok urtero errepikatuz eta lanak ondo finkatuta dituztela. Antolakuntza milimetrikoki neurtutako makineria da, patatak zuritzen, ogia mozten, botilak irekitzen, mahaiak jartzen eta garbiketa lanetan aritzen diren boluntarioekin. Sarrerak gaur bertan jarriko dira salgai, eta antolatzaileek espero dute, aurreko urteetan bezala, egunean bertan agortuko direla, goizeko lehen ordutik ilarak sortuz.
