URA-Uraren Euskal Agentziak eta Artziniegako Udalak lankidetza-hitzarmen bat sinatu dute "Artziniegako saneamendu-kolektorearen proiektua. Gordéliz – Artziniega tartea" aurreikusten dituen lanak egiteko. Jarduera estrategiko honek zuzeneko isurketak eta oraindik existitzen diren hobi septikoak ezabatuko ditu, udalerriko ur-zikloaren azpiegiturak modernizatuz. URBIDEk kudeatuko eta mantenduko ditu azpiegitura berriak.

Hitzarmena URAko zuzendari nagusi Asier López Etxebarriak eta Artziniegako alkate Joseba Vivanco Retesek sinatu dute. Bi erakundeek azpimarratu dute lankidetza horren garrantzia tokiko intereseko azpiegitura hidraulikoetan aurrera egiteko. Obra honekin, URAk beste urrats bat eman du Arabako Lurralde Historikoan azpiegitura hidraulikoak finantzatzeko eta gauzatzeko Esparru Akordioan jasotakoak betetzeko.

Jarduketa honek hobekuntza nabarmena ekarriko dio udalerriaren ingurumen-osasunari, Herrerias ibaira egiten diren isurketa zuzenak ezabatuz. Gainera, hobi septiko txikien ordez hondakin-urak biltzeko eta bideratzeko sistema moderno eta eraginkor bat ezarriko da, osasun-arriskuak murriztuz eta ingurunearen kalitatea hobetuz.

Lan hauei esker, Gordéliz, La Venta, San Antonio eta La Teja herriguneetako isurketak udal-sarean integratuko dira. Kolektore berri bat instalatuko da, 2.500 metro luze izango dena, eta ur-hornidurarako sarearen zati bat berrituko da, Artziniegako presatik ponpatze estaziorainoko ur gordinaren eroanbide-tartea barne.

4,98 milioi euroko inbertsioa aurreikusten da. Uraren Euskal Agentziak bere gain hartuko ditu obren kontratazioa, zuzendaritza teknikoa eta finantzaketa osoa, 12 hilabeteko epean egiteko. Artziniegako Udalak, berriz, beharrezko lursailak jarriko ditu eta azpiegitura amaitutakoan titulartasuna jasoko du.