Arabako Foru Aldundiak Aiaraldeko zenbait errepide hobetuko ditu 2026ko Bide Zoruen Planaren bidez, bai eta eskualdea Arabako beste herriekin edota Gasteizekin lotzen dituzten bideak ere. Guztira 40 errepidetako bide tarteen zorua konponduko dute, eta aurrekontuaren ia %55 bigarren mailako errepideetako lanetara bideratuko da.
Eskualdean egingo diren obren artean, arazoak eta istripuak ohikoak diren A-3641 errepidea konponduko dute, 2 kilometroko tartean behintzat. Hobetze-lan horiek ekainaren erdialdean iragarri zituzten, Jon Nogales foru diputatua Okondoko eta Aiarako alkateekin bildu zenean.
Halaber, A-625 errepidean, zuloak, pitzadurak eta deformazioak dituzten gune jakin batzuk konponduko dituzte Amurrio eta Laudio artean. Urduñako mendateko A-2622 bidean ere errodadura geruza berrituko dute kilometro batean.
Lehentasunezko intereseko sareko bost errepidetan ere egingo dira lanak: A-1 (sei tarte, 10,5 km), N-124 (kilometro bat Las Conchas tunela baino lehenago), N-240 (gune puntualak), N-622 (kilometro bat Gopegiko lotunearen ondoren) eta AP-1 (gune puntualak).
