Azken asteetan Laudioko igerileku publikoetan izandako gorabeheren aurrean, Udalak eta Ebone enpresak, instalazioen kudeatzaileak, funtzionamendua hobetzeko hainbat konpromiso hartu dituzte. Hainbat egunetan igerilekuak itxita egon dira, kloro maila desegokia edo gorotz bat agertzeagatik, eta horrek herritarren artean kezka sortu du.
Ebone enpresak barkamena eskatu die herritarrei gertatutakoaren ondorioz sortutako eragozpenengatik. Egoera honi aurre egiteko, Udalak bilera egin du enpresarekin eta langileen ordezkariekin, zerbitzuaren kalitatea eta langileen lan-baldintzak hobetzeko helburuarekin.
Hiru konpromiso nagusi adostu dira. Lehenik, eguraldi txarra dagoenean igerilekuak 20:00etan itxiko dira, eta gainerako egunetan, 21:00etan. Neurri honek zerbitzuaren kalitatea eta langileen lan-baldintzak uztartzea du helburu, eguraldi baldintzetara egokituz.
Bigarrenik, Udala bitartekari arituko da enpresaren eta langileen artean, komunikazioa errazteko eta akordioen jarraipena bermatzeko. Azkenik, Ebone enpresak konpromisoa hartu du zerbitzua bere osotasunean emango dela ziurtatzeko, beharrezko baliabide tekniko eta materialak eskainiz.
Bileran parte hartu duten alde guztien jarrera eraikitzailea eskertu du Udalak, eta azpimarratu du herritarrei kalitatezko zerbitzu publikoa eskaintzen jarraitzeko borondatea dagoela.
