Patxita Etxea coworking gune eta ikasgela zerbitzua eskaintzen hasiko da irailaren 15ean. Anbulatorioa ere hartzen duen eraikin honetan, atzeko sarreratik sartu ahal izango da zerbitzu berrietara, eta Aiarako edozein bizilagunek erabili ahal izango du.
Zerbitzua erabiltzeko, Aiarako Udalaren bulegoetan edo haien webgunean erabilera baimena eskuratu beharko da. Interesdunek 18 urte beteak izan beharko dituzte; 16 eta 17 urtekoek, berriz, guraso edo tutore legalen baimena aurkeztu beharko dute.
Prozedura burutu ondoren, telefonoan aplikazio bat deskargatu beharko dute erabiltzaileek, sarrera kudeatzeko. Udalak gogorarazi du baimena pertsonala dela eta eskubidea ematen diola titularrari espazioa erabiltzeko, 10:00etatik 20:00ak arte.
Ibilgailuz joaten direnek Gizarte Zentroaren aurrean aparkatu beharko dute, Patxita Etxeko plazak anbulatoriora doazenentzat gordeko baitira.
Proiektu honek ibilbide luzea izan du. 2016an anbulatorioa ireki zen, eta 2017an hasi ziren lantzen erabilera anitzeko gune honen proiektua. Horretarako, Arabako Foru Aldundiari dirulaguntza eskatu zitzaion. 2020an lizitatu zen proiektu teknikoa, eta 2022an obrak gauzatzeko lizitazioa prestatu behar izan zuten behin baino gehiagotan. Azkenik, iazko urrian amaitu ziren lanak.
