Gaur goizean, Luiaondon zegoen etxe okupatu bat hustu dute. Udaleko teknikari talde bat, Ertzaintzaren Brigada Mugikorreko hiru furgoneta eta Laudioko Ertzain Etxeko dozena erdi agente bertaratu dira eraikina husteko. Tokiko erakundeak higiezina hondamen egoeran deklaratu du, teilatua oinarrizko segurtasuna arriskuan jartzen duelako.
Udal langileek eta poliziek barruan zeuden hamar pertsonei eman diete egoeraren berri, kalera atera baino lehen. Ez da istilurik izan eta prozedura tentsiorik gabe egin da, ordubete inguru iraun duena. Etxeko atea irekita zegoenez, barrura sartu eta banan-banan jakinarazi diete egoera.
Gaur hamar lagun zeuden lotan eraikinean, baina gutxienez beste bost pertsona ere erabiltzen ari ziren tokia. Horiek guztiak kale egoeran geratu dira.
Eraikina hustu ondoren, inguruak hesitu eta babestu beharko dituzte teilatuaren zatiak kalera ez erortzeko eta herritarren segurtasuna bermatzeko.
Etxearen jabe den familiaren kide batek azaldu duenez, lehen esku-hartzea hesitu eta babestea izango da. Senideak adierazi du etxea urtero erabiltzen zutela familiak Gabonak ospatzeko eta uda igarotzeko.
Etorkizunerako, familiak alokatu nahi du etxea "bizitza izan dezan", bi familientzako prestatu eta Eusko Jaurlaritzarekin elkarlanean. Hala ere, horretarako dirua beharko dutela eta "sortu dizkiguten kalteak eta hondamendia konpontzeko" adierazi du, teilatua oso kaltetuta dagoelako.
Familiak ukatu egin du iaz etxean egondako desokupazio enpresa deitu izana. Ez dakite nork egin zuen deia.
“"Nik ez nuen egin, ez dakit nork egin zuen."
Iaz, Desokupacionlegal enpresako talde bat etxean egon zen eta komunikabideko kazetari bati eraso zion lanean ari zela. Aiaraldeko langileak salaketa jarri zuen eta kasua epaitegian dago.
