Laudioko udalbatzak 1,8 milioi euroko inbertsioak eta hobekuntzak onartu ditu gaurko saioan. Hala ere, hezkuntza-zentroetako konponketetarako dirulaguntza proposamena eta fakturen ordainketari lotutako hainbat partida mahaia gainean geratu dira, momentuz, eztabaida gehiago behar dutelako.
Oposizioko talde politikoek, kontu hartzailetza txostenetan zenbait akats aurkitu ondoren, horien inguruko eztabaida eta lanketa gehiago egitea eskatu dute. Aurreko egunetan, EAJk berak udalerriaren zorren inguruan zuen kezka adierazi zuen.
Udal gobernu taldeak, bere aldetik, akatsak ahalik eta lasterren zuzentzea eskatu du, Udal Osoko Bilkuran berriro lantzeko, ekainaren 29an izango dena.
Onartutako egitasmoen artean, Laudio Antzokiaren obraren hirugarren moldaketa dago. Lanak amaitzen ari diren fase honetan, likidazioari aurre egiteko partida hornitu du Udalak, ordainketa guztiak amaitutzat emateko.
Kiroldegian ere aurrerapausoak eman dira: gas-galdarak aerotermian oinarritutako sistema batez ordezkatuko dute, estalkian kokatutako instalazio fotovoltaiko baten bidez elikatuta. Aurreikuspenen arabera, energia-kontsumoa %22 murriztuko da eta behar den energiaren %30 tokiko iturri berriztagarrietatik etorriko da. Horretarako, finantzaketa eskatuko du udalak.
Halaber, padel pistaren kalitatea eta segurtasuna hobetzea onartu da, herritar ugarik erabiltzen duten azpiegitura hobetzeko. Horrez gain, Gizarte Kohesio Arlotik bideratzen duten Bizi programaren aurrekontua handitu dute, udalerri aktibo eta osasuntsua sustatzeko eta herritarren osasun biopsikosoziala indartzeko.
