Laia Eskola egitasmoak hamar urte bete ditu eta 156 ekintzekin ekingo dio ikasturte berriari. Ekintza asko Aiaraldean izango dira, eta Arabako Foru Aldundiaren proiektu hau Urduñak eta Orozkok ere osatzen dute, gaur Okondoko udaletxean agerian geratu den moduan.
Emakumeen ahalduntzea eta feminismoa sustatzen duen proiektuaren aurkezpenean, Iñaki Gurtubai Berdintasun, Euskara eta Gobernantza Saileko foru diputatua, Joana del Hoyo Berdintasun zuzendaria, eta Orozko, Okondo, Laudio, Artziniega eta Amurrioko alkateak, baita Aiara zein Urduñako zinegotziak eta Aiarako Kuadrillako presidentea bildu dira.
Aurki banatuko dituzte egitasmoaren berri ematen duten liburuxkak. Erakunde anitz horien ordezkariek berdintasunaren, feminismoaren, ahalduntzearen eta emakumeen saretzearen aldeko mezua indartu nahi izan dute.
Eneritz Alonso zinegotziak gidatu du agerraldia. Iñaki Gurtubaik nabarmendu du Laia Eskolak hamar urte bete dituela eta ahalduntze eskolatik lurralde osoa saretzera igaro dela. Aurten 153 hitzordu aurkeztu dituzte, baina iaz 458 izan zirela gogorarazi du.
Ondoren, Iñigo Pinedok (Aiaraldeko Kuadrillako presidentea), Aitor Iza (Orozkoko alkatea), Txerra Molinuevo (Amurrioko udalburua), Karmele Poblacion (Aiarako zinegotzia), Nagore Gomara (Laudioko zinegotzia), Onintze Elvira (Artziniegarra) eta Uxue Mendibil (Urduñarra) zinegotziek euren udalerrietan egingo diren ekintzen berri eman dute.
Ordezkari publikoek egindako aipamenetan, hainbat ekintza aipatu dituzte, hala nola zinema feminista, literatura klubak, emakume abesbatzak sortzeko deialdiak, bakarrizketak eta tailerrak.
Ekintza guztiak hemen ikus daitezke.
