Martxoko Udal Osoko Bilkuran eman zitzaion hasierako onarpena azpiegitura hori eraikitzea ahalbidetuko lukeen Plan Bereziari. Gaiak eztabaida sortu zuen plenoan, herritar batek proiektuarekiko desadostasuna adierazi baitzuen.
Udal gobernuak argudiatu zuen legez derrigortuta dagoela proiektua onartzera, Bizkaiko Foru Aldundiaren eta URA agentziaren oniritzia baitu. Gainera, udal arkitektoak ere aldeko hirigintza txostena egin zuen, eta tokiko erakundeak abokatu baten aholkularitza kontratatu zuen egoera bideratzeko.
“"Epeak luzatu egingo dira, bidean helegiteak egon daitezke, eta gero, behin betiko onarpena Bizkaiko Foru Aldundiaren esku egongo litzateke, Arakaldo 1.000 biztanletik beherako udalerria delako."
Alkateak adierazi du Ekin Inbertsioak enpresak 2021 etik daramala proiektu honekin, eta iazko martxoan aurkeztu zutela Plan Berezirako eskaera. Maiatzean erretiratu egin zuten, eta irailean berriz aurkeztu zuten. Horregatik, eszeptikoa da proiektuaren garapenarekiko, tramite legal guztiak beste bi urtez luzatu daitezkeelako, eraikuntza hasi baino lehen.
Gainera, datu-zentro batek argindar asko kontsumituko lukeela eta espazioa gaur egun horretarako prestatuta ez dagoela ere aipatu du. 2019an pasa zen Norten enpresaren lantegi abandonatua Ekin Inbertsioak enpresaren eskuetara, eta orduan ekin zieten eraisketa lanei.
Hamar urte baino gehiago eman ditu Ugarrizako lurzoru industrial horrek hutsik, Norten hormigoi enpresak ateak itxi zituenetik. Enpresa honek San Mames berriko harmailak egin zituen, besteak beste. Aurreko alkateak hainbat irregulartasun salatu zituen urte horietan, hala nola obra baimenik gabe gauzak kentzea edo amiantoa baimenik gabe kentzea.
2019an lurzorua Ekin Inbertsioak enpresaren eskuetara pasa zenean, fabrika zaharra eraitsi eta pilatutako zaborra bildu eta erre zuten. Horrek kontrolik gabeko sute bat eragin zuen gau batean, suetako bat ez zelako ondo itzali. Enpresak, bere aldetik, Bizkaiko Foru Aldundiaren eta Base Gorriaren baimen guztiak zituela ziurtatu zuen.
Une honetan, lursail lau bat da zonaldea. Ekin Inbertsioak konpainiak enpresa juridiko berri bat sortu du datu-zentroaren proiektua egikaritzeko, CPD 4 Arakaldo SL izenekoa. Hala ere, alkateak nabarmendu du Ekin Inbertsioak lurzorua kudeatzera mugatuko litzatekeela, eta gero beste enpresa baten eskuetan utziko lukeela proiektua.
Momentuz, konpainiak hondakin biltegi moduan baliatzen du Arakaldoko lurzorua, eta kamioiak beste toki batzuetako hondakinak pilatzen aritzen dira bertan. Udalak hainbat errekerimendu bidali dizkio enpresari jardun horren nondik norakoen berri izateko. Ekin Inbertsioak enpresak ez du adierazpenik egin nahi izan gaiari buruz.
