Bilketa hau Aiaraldean egingo da, zehazki Laudioko Institutuan, Latiorro Ikastetxean (Laudio) eta Zaraobe Institutuan (Amurrio), apirilaren 15etik 24ra. Gainera, apirilaren 25ean, bilketa bereziak egingo dira Laudioko Lamuza Plazan eta Amurrioko Eroski eta Dia supermerkatuen aurrean, 11:00etatik 14:00etara.
Itzalaldiak eta erregaiaren eskasia ohiko errealitate bilakatu dira eta eguneroko bizitzaren arlo guztiak kaltetzen ari dira, horien artean, garraioa, elikagaiak zein ura eskuratzeko aukera, osasungintza eta hezkuntza.
Antolatzaileek azpimarratu dute Kubako egoera “oso larria” dela, eta horren arrazoia Amerikako Estatu Batuek iraultzaz geroztik uhartearen aurka mantendu duten politika isolazionista eta kriminala dela. Blokeoa areagotu egin da azken urteetan, batez ere Donald Trumpen agintaldian, eta interbentzio militar baterako mehatxua ere handitu da.
Bilketa honetan hainbat produktu mota eskatzen dira: material sanitarioa (2027ko ekainetik aurrera iraungiko diren medikamentuak, tresna medikoak, eskularruak, preserbatiboak), higiene-materiala (konpresak, tanpoiak, pixoihalak), garbitzeko materiala (erratzak, fregona), elikagai ez-galkorrak (latak, pasta, lekaleak, esne-hautsa, olioa, 2027ko urtarriletik aurrera iraungiko direnak), elikadura-osagarriak (bitaminak, mineralak, Omega3), kirol-materiala (baloiak, erraketak, bizikletak) eta ikas-materiala (arkatzak, koadernoak). Ez dira testu-liburuak edo entziklopediak bilduko.
