Koalizio subiranistak ikus-entzunezkoen arloan iragarritako azken inbertsioak jarri ditu deskoordinazio horren adibide gisa. Izan ere, Arabako Foru Aldundiak eta Bizkaiko Foru Aldundiak Amurrion eta Urduñan iragarri dituzte proiektuak, hurrenez hurren. "Ez du zentzurik hamar kilometro baino gutxiagora bi proiektu abian jartzea, bi zuzendaritza desberdinen menpe daudenak eta eremu berean lehiatzen direnak", adierazi du Eva Lopez de Arroyabe EH Bilduk Arabako Batzar Nagusietan duen bozeramaileak.
Arabako Foru Aldundiak 2025eko apirilean iragarri zuen ikus-entzunezko HUB bat bultzatzeko asmoa, "filmaketak erakarri eta sektorea dinamizatzeko". Horretarako, 1.100 metroko industria-pabiloia erosi zuen Maskuribai industriagunean, 600.000 euroko inbertsioa eginez. Gainera, beste 400.000 euro gorde zituen Refor enpresaldean ikus-entzunezko ekoizpenekin loturiko zentroa abian jartzeko. Foru Gobernuak Aiaraldeko Plan Estrategikoaren barruan kokatu zuen inbertsioa.
EH Bilduk gogorarazi duenez, Arabako Foru Aldundia harro zegoen Bizkaiko bere homologoari aurrea hartu ziolako, garai hartan horrelako pabiloi baten bila zebilelako. Hala ere, Arabako Foru Aldundiak Maskuriabiko pabiloiko inbertsioa egin eta astebetera iragarri zuen Elixabete Etxanobe Bizkaiko Ahaldun Nagusiak Urduñan pareko proiektu bat martxan jartzeko asmoa.
Martxoan jakinarazi zuen Bizkaiko Foru Aldundiak 4,6 milioi euro baliatuko dituztela Urduñako Mariaren Lagundiko ikastetxe zaharreko eraikinak eta lursailak egokitzeko. Bilbao Bizkaia Ikus-entzunezko HUB proiektuaren barruan kokatu dute egitasmoa, eta Bilboko Punta Zorrotzan izango du bigarren egoitza.
Aipatutako datuekin, EH Bilduk galdera sorta erregistratu duela iragarri du, "Aiaraldeko Eskualdeko Plan Estrategikoaren esparruan bi proiektuak nola finantzatuko diren eta, batez ere, bi proiektuak koordinatzeko zer mekanismo ezarriko diren" jakiteko.
Koalizioak behin baino gehiagotan azpimarratu du eskualdeko udalerri bizkaitar eta arabarren arteko koordinazioaren beharra, eta "eskualde naturaleko udalerri guztiak bilduko dituen eta eragile ekonomiko eta sozialak ere bilduko dituen organo bat sortzeko" proposatu du. Ikus-entzunezkoen arloan soilik ez, industria garapenean ere gabezia horretaz ohartarazi du EH Bilduk, adibidez, Aiaraldeko etorkizun industriala jorratzeko mahaiaren sorreran.
