Cosme Ayala Yoldi eta Manuel Hernáez Ruidíaz milizianoen gorpuzkiak itzuli dizkiete familiei, Eusko Jaurlaritzak eta Gogorak antolatutako ekitaldi batean. Gudariok Zornotzako hilerrian topatu zituzten 2025eko uztailean, hobi komun batean. Gaur, gerran hil zituztenetik 90 urtera, haien alabek jaso dituzte aita zirenaren gorpuzkiak.

Ekitaldia Bilbon egin da, eta bertan izan dira Maria Jesus San Jose Justizia eta Giza Eskubideen sailburua, Alberto Alonso Gogora institutuko zuzendaria eta Zornotzako alkate Ainhoa Salterain. San Jose sailburuak azpimarratu duenez, "beharrezkoa da iragana berreskuratzea, gerra zibileko eta frankismoko desagertuak bilatzea, inoiz utzi behar ez zuten lekura itzultzeko, hori baita, hain zuzen ere, memoria egitea".

Cosme Ayala Yoldi eta Manuel Hernáez Ruidíaz milizianoak 1937ko apirilean hil ziren Elorrioko eta Muxikako gerra-fronteetan, hurrenez hurren. Desagertutzat jo zituzten biak, harik eta Aranzadi zientzia elkarteak Zornotzako hobi komuna argitara atera eta milizianoen alabek identifikazio genetikoa egitea ahalbidetu duten arte.

Ayala nafarra zen jaiotzez, eta Barakaldon bizi zen. Ezkondua zegoen eta bi alabaren aita zen. Meabe 1 Largo Caballero batailoiko miliziano modura borrokatu zuen, gaztedi sozialistari atxikitako bataloian. 1937ko apirilaren 27an hil zen Elorrioko gerra-frontean. Hernáez, berriz, errioxarra zen jaiotzez. Bilbon bizi zen, ezkonduta zegoen eta alaba baten aita zen. Gerran Zabalbide batailoiko miliziano bezala borrokatu zuen, Izquierda Republicanari atxikitako batailoian. 1937ko apirilaren 20an hil zen, Muxikako frontean.

Zornotzako hilerriko hobi komunean 157 pertsonaren gorpuzkiak agertu ziren. Orain arte, 8 pertsona identifikatu dituzte, 1936ko abendutik 1937ko maiatzera bitartean Bizkaiko hainbat gerra fronteetan hildakoak. Gogora Institutuak senideak deitu ditu DNA probak egitera.