Ekimenak egun osoko jarduera programa bat eskaini zuen, natura, gorputza eta euskara oinarri hartuta. Goizean, parte-hartzaileek ibilaldi bat egin zuten, non Azalako ordezkari batek Ane Zubeldia Magriñáren Kontra olerki liburuaren irakurketa egin zuen. Horrela, euskara eta poesiaren magia isiltasunean entzuteko, paisaiaz gozatzeko eta gorputzak pausatzeko aukera izan zuten.
Irakurketan isiltasuna erabili zen, zikloaren helburuetako bat baita sortzaileen egoerari buruz hausnartzea, gorputzen egoera entzutea, euskarak eskaintzen duen balio erantsia sentitzea eta naturaren baldintzak kontuan hartzea, sorkuntza praktikak bizigarriagoak izan daitezen.
Ibilaldia amaitu ondoren, parte-hartzaileek lokatzetan murgiltzeko aukera izan zuten, pentsatzeko, jolasteko, esperimentatzeko eta sentitzeko espazio bat sortuz. Ondoren, Garaioneko ordezkari batek gidatuta, zumezko eraikuntza bat ezagutu eta elkarlanean nola lantzen eta eraikitzen den ulertu zuten.
“"Auzolanak duen garrantziaz, zer den eta zer ez den, genero harremanek nola zeharkatzen duten sarritan, taldean lan egitearen garrantziaz, ohitura hori zaintzeko eta mantentzeko premietaz, eta gaur egun euskaraz sortzen duen kulturgintzak dituen erronkei erantzuteko tresna baliotsu gisa duen balioaz hitz egin zen."
Jarduera bizi horien ostean, bazkariaren ordua iritsi zen. Indarrak berritu ondoren, Faktorira joan ziren Lurdes Iriondori buruzko dokumental bat ikustera, euskal erreferente hori hobeto ezagutzeko eta omentzeko. Eguna amaitzeko, Amaia Mirandak kontzertu intimo eta potentea eskaini zuen, euskaraz idatzitako abestiekin eta euskaratutako batekin. Azkenik, Berba Labanakaz taldeak emanaldi punk eta lotsagabea eskaini zuen, zikloari amaiera paregabea emanez.
