Aiaraldea Kultura Faktoriak gaur bertan hasiko du Sormen Egonaldia programaren edizio berria. Ekimen honek lau sortzaileei aukera emango die astebetez beren proiektu artistikoetan lan egiteko, euskararen ingurunean murgilduta. Aiaraldea Kooperatibak dirulaguntza ekonomikoa (500 euro), ostatua eta otorduak, laguntza artistikoa, eta komunikazio zein ekoizpen arloetan babesa eskainiko die. Gainera, azaroaren 21ean Arteman Festan parte hartzeko aukera izango dute.
Aurten parte hartuko duten lau gonbidatuak honako hauek dira: Itxaso Gardoki (gaurdanik irailaren 24ra), Nerea Lizarralde (irailaren 24tik urriaren 1era), Andrea Berbois (urriaren 5etik 10era) eta Jon Garrido Gallardo (azaroaren 5etik 12ra).
Lizarraldek, Berboisek eta Garrido Gallardok saio irekiak eskainiko dituzte beren sorkuntza prozesuak ezagutzera emateko. Lehenengoak urriaren 1ean izango du bere saioa, 19:00etan; bigarrenak urriaren 10ean, 12:00etan; eta azkenak azaroaren 11n, 19:00etan.
Artistek duten ezaugarri komun bakarra euskaraz aritzea da. Nerea Lizarralde aktore eta sortzaile eszenikoak Sumendi proiektuan lan egingo du, antzerkia, musika eta kea uztartuz. Itxaso Gardoki psikologo ohiak ikerketa eraldatzailea, literatura garaikidea, saiakera politikoa eta performance autobiografikoa landuko ditu, diziplina psikiatriko instituzionaletik haratago.
Andrea Berbois musikariak zuzeneko kontzertu esperimental bat aurkeztuko du, biolina, teklatua, sintetizadorea, ahotsa, euskal melodiak eta elektronika erabiliz. Jon Garrido Gallardo antzezleak, berriz, depresioa eta zaurgarritasuna izango ditu abiapuntu, satira eta umorea baliatuz, eta dantza, mugimendua, abestiak, olerkiak eta antzerkiaren bidez fantasia mundu bat proposatuko du.
Egonaldiak ez ezik, Aiaraldeak deialdi irekiko bekak ere deitu zituen, eta horien bidez Ane Zapirain Gorostegi eta Oihane Marcos Gallego artistek jasoko dute babesa. Zapirainek dantza garaikidea ikertuko du lurzoruaren eta mugen arteko harremanean, eta Marcos Gallego, berriz, euskara, historia eta identitatearen inguruko erradiografia egingo du bere Marratik At egitasmoaren bitartez.
