Gernika-Lumoko Kultur Etxeak udako hilabeteetarako diseinatutako egitasmoaren bidez, irakurketa ohiturak ohiko espazioetatik atera eta kaleetara eramango dituzte. Helburu nagusia kultura herritar guztien eskura jartzea eta oporraldian aisialdirako aukera berriak eskaintzea da.
Ekimenak bi ardatz nagusi ditu. Batetik, Letren Etxea izeneko liburutegi ibiltaria, udalerriko hainbat auzotatik igaroko dena. Bestetik, Liburutegia plazara proiektua, Foruen Plazan, Kultur Etxearen arkupeetan, irailaren erdialdera arte egongo den irakurketa gunea.
Liburutegi ibiltariak prentsa, aldizkariak eta mahai-jokoak eskainiko ditu, astelehenetik ostiralera, 11:30etik 13:30era eta 17:30etik 19:30era. Zerbitzua Santa Luzian hasi da, eta ondoren San Juan Ibarran eta Lorategietan egongo da.
Gainera, haurrentzako ipuin-kontalari saioak antolatu dituzte San Juan Ibarran uztailaren 27an eta Lorategietan abuztuaren 19an, biak 18:00etan. Kultur Etxeko lehen solairuan, Libuterraza gunea ere egongo da erabilgarri eguraldiak laguntzen duen bitartean.
