Joan den igandean, goizeko zazpi eta erdiak aldera, Gernikako polizia-etxeak jakin zuen Bermeoko Alde Zaharrean gertatutako liskar baten berri, non gazte talde batek bi neraberi eraso egin baitzien.

Gertaera izan zen tokira joandako polizia-baliabideek, Bermeoko Udaltzaingoaren laguntzarekin, biktimei lagundu zieten. Hauek gorputzean hainbat zauri zituzten eta mediku-laguntza jaso behar izan zuten.

Inguruak miatuta, agenteek susmagarri bat geldiarazi zuten, biktimek emandako ezaugarriekin bat zetorrena eta horietako bati ostutako erlojua zeramana. Erlojua jabearen eskuetan utzi zen. Gainera, identifikatu ondoren egiaztatu ahal izan zen, baita ere, agindu judizial bat indarrean zuela.

20 urteko gaztea atxilotu ondoren, polizia-etxeetara eraman zuten beharrezko izapideak egiteko. Atxilotuak, hainbat polizia-aurrekari dituena, epailearen eskuetan jarri dute astelehen goizean. Gainera, beste hiru gazte identifikatu zituzten Ertzaintzaren patruilek, gertakarietan parte hartu izanaren ustez.