Eskaerak aurkezteko epea azaroaren 30era arte egongo da zabalik. Deialdiak 2025eko urritik 2026ko irailera bitartean egindako jarduerak hartzen ditu bere baitan, eta 2023-2027 rako aurreikusitako udal-neurrien barruan kokatzen da.
Laguntzak eskuratu ahal izango dituzte Gernika-Lumon erroldatuta dauden pertsonek. Halaber, HITZARGUNE hitzemena sinatu duten enpresa, merkataritza eta elkarteetako langileek eta kideek ere eskatu ahal izango dituzte, nahiz eta udalerrian erroldatuta ez egon. Era berean, Udaleko Eskola Kontseiluan parte hartzen duten ikastetxeetan matrikulatutako ikasleen aitona-amonei ere zuzentzen zaie.
Gidabaimena lortzera bideratutako modalitatean, 16 urtetik gorako gernikarrek eskatu ahal izango dute auto-baimena, eta 14 urtetik gorakoek ziklomotorrarena.
Deialdiak hiru modalitate ditu: euskara ikasteko eta hobetzeko ikastaroak (HABEk homologatutako zentroetan), unibertsitate-ikastaroak osorik euskaraz (udako edo oporraldietan), eta gidabaimena lortzeko azterketak euskaraz egitea. Euskara-ikastaroetarako, laguntzek 600 eurorainokoak izan daitezke ikastaro bakoitzeko (gehienez 900 euro pertsona eta urteko). C2 mailako ikasleentzat, gehienezko zenbatekoa 500 euro da. Barnetegietako egonaldiak ere lagundu daitezke, 400 eurorainokoak.
Gidabaimenari dagokionez, 80 euro ko laguntzak aurreikusten dira azterketa teoriko eta praktiko bakoitzeko auto-baimenerako, euskaraz lehen deialdian eginez gero. Bigarren deialdian, 40 euro dira proba bakoitzeko. Motozikleta eta ziklomotor baimenetarako, 50 euroko laguntza ezarri da.
Eskaerak Gernika-Lumoko alkateari zuzenduko zaizkio eta beharrezko dokumentazioarekin batera aurkeztu beharko dira, jarduera diruz lagundua justifikatzeko eta oinarrietan ezarritako baldintzak betetzen direla egiaztatzeko.
Udalak sustapen-neurriekin jarraitzen du euskara ikastea eta hobetzea errazteko, prestakuntzaren kostu ekonomikoa murrizteko eta eremu akademiko, profesional eta egunerokoan erabiltzea sustatzeko. Interesdunek oinarriak kontsulta ditzakete modalitate bakoitzaren baldintza zehatzak ezagutzeko eta epe barruan aurkeztu beharreko dokumentazioa egiaztatzeko.
