Gauerdia jota, Urrestillan termometroak 25 gradu inguru markatzen zituen, eguneko unerik atseginena eskainiz. Giroak eta parrandarako gogoak bultzatuta, gazte ugari elkartu zen plazan, zuzeneko musikak lagunduta. Aiama bakarlari bermeotarra izan zen lehena oholtzara igotzen, 20:00ak aldera. Ondoren, Fan&Go erromeria talde zarauztarrak hartu zion erreleboa gauerdira arte, eta Indate DJak jarraitu zuen gaua borobiltzen.
Sanjoanetako egun nagusia atzokoa izan bazen ere, festek ez dute etenik izango bihar iluntzera arte. Gaur, osteguna, San Joan Txiki Eguna ospatuko dute, eta ekitaldi nagusiak umeentzat izango dira arratsaldean. Aurretik, eguerdi partean, sagardo dastaketa egingo dute, eta bazkalostean, mus txapelketa izango da.
Bihar, ostirala, San Joan Hirugarrena ospatuko da. Egitarauak umeentzako jolasak aurreikusten ditu arratsaldeko 17:00etatik aurrera. Jarraian, patata tortilla lehiaketa izango da, eta ondoren, zuhaitzaren entierroarekin emango diote amaiera festei.
