Udal instalazioek etenik gabeko zerbitzua eskainiko dute datozen lau hilabeteetan. Zehazki, ekainaren 1etik 14ra eta irailaren 16tik 30era, astelehenetik ostiralera 15:00etatik 20:00etara eta asteburuetan 11:00etatik 20:00etara egongo dira zabalik. Ekainaren 15etik irailaren 15era bitartean, berriz, ordutegia luzatu egingo da, eta 11:00etatik 20:00etara irekiko dituzte ateak egunero.

Erabiltzaileen segurtasuna eta antolaketa egokia bermatzeko, igerilekuetako jarduera guztiak itxiera ordua baino 15 minutu lehenago amaituko dira. Prezioei dagokienez, abonatuek eta 4 urtetik beherakoek doako sarrera izango dute. Abonurik ez dutenentzat, sarrerak 5 euro balio du 4 eta 16 urte bitartekoentzat, eta 7,50 euro 17 urtetik gorakoentzat.

Udako abonua eskuratzeko aukera ere badago: familiarra 64,90 eurokoa da, banakakoa 46,90 eurokoa, eta 25 urtetik beherakoek 36,10 euro ordaindu beharko dute.

Gainera, diru sarreren arabera hobariak eskatzeko aukera izango dute herritarrek. Informazio gehiago eta eskaerak egiteko, ESAN herritarren arreta bulegora edo udal egoitza elektronikora jo daiteke.

Uztailaren 16an, ur puzgarrien zirkuitu berezia antolatuko da, batez ere herriko txikiei zuzenduta. Eguraldiaren arabera data alda daiteke, eta horrelakoetan udal komunikazio kanalen bidez emango da jakinarazpen berria.