Ekimen honen 26. edizioa, “Gure eskuetan” lelopean, ondarearen balioari eta haren zaintzaren erantzukizun kolektiboari buruzko ikuspegi zabala proposatzen du. Europako Kontseiluak 2026rako ezarritako gaiaren arabera, ondarea mehatxatzen duten arriskuak eta hura babesteko kolektiboki jarduteko premia azpimarratzen dira, kultura-ondareak etorkizuneko belaunaldientzat esanguratsua eta eskuragarria izaten jarrai dezan.

Urrian ospatuko diren jardunaldien aurretik, Bizkaiko Foru Aldundiak hitzaldi-ziklo bat antolatu du apirila eta ekaina bitartean, Ondare Aretoan. Saio horietan, ondarearen erronkei, esanahiei eta erantzukizunei buruz hausnartuko da, hainbat adituren eskutik, dokumentazioa, identitatea, emakumeen memoria eta kontserbaziorako irizpide garaikideak bezalako gaiak jorratuz.

Hitzaldi-zikloa apirilaren 21ean hasiko da Raquel Cilla López Bilboko Eleiz Museoko zuzendariaren eskutik, arriskuan dagoen ondare erlijiosoari buruz. Maiatzaren 12an, Jon Mentxakatorre Odriozolak nortasunaren, balioen eta ondarearen arteko harremana aztertuko du. Ekainaren 2an, Isabel Mellén historialariak heriotzari lotutako erritual femeninoak jorratuko ditu, eta zikloa ekainaren 23an amaituko da Eusebio Corcuera Alonsoren eskutik, ondarearen kontserbazio eta zaharberritzearen inguruko ikuspegi zientifiko eta etikoa aztertuz.

Hitzaldi hauek kultura-ondarearen zeregina eztabaidatzeko balioko dute gizarte-, teknologia- eta ingurumen-eraldaketa sakonen testuinguruan. Ondarea, materiala zein ez-materiala, baliabide bakarra eta berriztaezina da, eta haren galera bakoitzak memoria kolektiboarekiko haustura dakar. Horregatik, jardunaldiak kultura eta historia nortasuna ikuspegi partekatu batetik babesteko gune gisa aurkezten dira, erakundeak, profesionalak eta gizartea inplikatuz.